Qashqadaryo viloyati huquqni muhofaza qilish organlari kontrabanda sigaretlari savdosiga chek qo`ydilar. Tezkor tadbir davomida viloyatdagi savdo markazlaridan biriga olib kirishga urinish chog`ida jami 18 mln 700 ming so`mlik 20 000 dona sigaret qo`lga olindi.
Shuningdek, Qarshida umumiy summasi 21 mln 820 ming so`m bo`lgan 18 000 ta aksizsiz sigaretlarni sotishga urinayotgan fuqaro qo`lga tushdi.
Qashqadaryo viloyati Bojxona boshqarmasi matbuot kotibi Aziza Xushvaqtova bojxona organlari ushbu faktlar bo`yicha tekshiruv o`tkazayotganligini ma`lum qildi.
Bugungi kunda Qashqadaryo viloyatida kontrabanda tamaki mahsuloti savdosining darajasi 10%ni tashkil qiladi. Noqonuniy sotuvchilar va kontrabandachilar davlat iqtisodiyotiga ulkan zarar etkazadi, shu sababli ularning faoliyatiga zudlik bilan chek qo`yish va qonuniy jazo qo`llash zarur. Boz ustiga, kontrabanda sigaretlari bilan birga O`zbekistonga ko`pincha taqiqlangan moddalar va qalbaki dori-darmon ham kirib keladi.
