"Sizlar bilan ko`rishib, hormanglar deb keldim". Prezidentning Sirdaryodagi tashrifi paxta dalasidan boshlandi

Jamiyat 06.10.2022, 14:08
"Sizlar bilan ko`rishib, hormanglar deb keldim". Prezidentning Sirdaryodagi tashrifi paxta dalasidan boshlandi

Prezident Shavkat Mirziyoev qishloq xo`jaligidagi ishlar holati, aholi hayoti bilan tanishish maqsadida 6 oktyabr kuni Sirdaryo viloyatiga keldi. Bu haqda Prezident matbuot xizmati xabar bermoqda. 

Qayd etilishicha, bu yil viloyatda 75 ming gektar maydonda paxta etishtirildi. Ayni paytda qariyb 80 ming gektar erga g`alla ekilmoqda.

Davlati rahbari Sirdaryo tumanidagi “Arslon bobo” va “Omonboy o`g`li Tugal” fermer xo`jaliklari dalasini ko`zdan kechirdi.

“Arslon bobo” fermer xo`jaligining er maydoni 90 gektar bo`lib, bu yil g`alladan 80 sentnerdan hosil olingan. Hozir paxta terimi avjida. Shuningdek, kartoshka, mosh, sabzi, piyoz kabi takroriy ekinlar ham etishtirilib, bozorga qo`shimcha mahsulot chiqarilmoqda.

“Omonboy o`g`li Tugal” fermer xo`jaligi 62 gektarda dehqonchilik qiladi. Bu erda ham g`alla hosildorligi 80 sentner bo`lgan. Ko`sak soni va terimning borishiga qaraganda, paxtaning ham “cho`g`i baland”.

Bu qo`shni xo`jaliklarda erlar lazerli uskuna yordamida tekislangani natijasida suv avvalgiga nisbatan 30-40 foiz tejalmoqda, sug`orish vaqti ham qisqargan. Nasoslar quyosh panellari quvvatida ishlaydi. “Yashil makon” umummilliy loyihasi doirasida dala chetlariga tut, tok, qoratol va boshqa ko`chatlar ekilgan.

Prezidentimiz shu erda sirdaryolik fermerlar, nuroniylar bilan suhbatlashdi.

- Xalqimiz «mehr ko`zda» deganidek, sizlar bilan ko`rishib, hormanglar deb keldim, - dedi Shavkat Mirziyoev. - Adolatli hakam bo`lsa, aytish mumkinki, Sirdaryoda ham o`zgarish bo`layapti. Lekin zamon shunday shiddat bilan o`tayaptiki, odamlarning niyatlari ilgarilab ketyapti. Shunga yarasha sharoit yaratish, xalqimiz talabini qondirish uchun yangi-yangi rejalar qilishimiz kerak. Bugun aziz Sirdaryo ahliga rahmat aytish bilan birga, erishilayotgan natijalar bardavom bo`lishi uchun, tumanlarning, odamlarning biri ikki bo`lishi uchun zarur yo`nalishlarni belgilagani keldik.

Fermerlar qishloq xo`jaligida imkoniyatlar kengayib, manfaatdorlik oshgani, majburiy mehnat tugatilgani, qo`shimcha mahsulotlar etishtirilayotganini aytishdi.

- Er - xalqimiz rizq-ro`zi manbai. Bir paytlar paxta maydonidan bir gektar ajratish jinoyat edi, takroriy ekin ekkan ta`qib qilinardi. Mana, hozir 80 ming gektar paxta va g`alla maydonlarini aholiga berdik, hali yana beramiz. Ulardan olingan mahsulot ham xalqimizniki-ku. Bozorga mahsulot, oilalarga daromad bo`ladi-ku. Bugun respublikadan kelgan rahbarlar va hokimlar yana 7,5 ming gektar er ajratilsa, Sirdaryo viloyatida ishsizlikni yo`q qilish bo`yicha taklif berayapti. Men buni, albatta, qo`llab-quvvatladim, - dedi Prezident.

Davlati rahbari shu erda dehqonchilik qilayotgan yoshlar bilan ham suhbatlashdi. Ular mazkur fermer xo`jaliklari dalasidan 0,5 gektardan er olib, mosh, sabzi, piyoz, sarimsoqpiyoz etishtirayotganini so`zlab berishdi. Bundan olgan daromadi hisobidan universitetda o`qish, uyini butlash rejalarini ma`lum qilishdi.

Prezident Sayxunobod tumanidagi “Shukronalik mo`jizalari” fermer xo`jaligi dalasida ham bo`ldi.

Xo`jalikning umumiy er maydoni 70 gektar. Joriy yilda 25 gektarga paxta, 45 gektarga g`alla ekildi. Hosildorlik mehnatga yarasha – yuqori.

Mamlakatimizda qaysi mahsulot ko`proq daromad keltirsa, o`shani ekishga e`tibor ortayotgani ham qishloq xo`jaligida yaxshi samara bermoqda. Bu fermer xo`jaligi ham g`alladan bo`shagan maydondan yaxshi daromad oladi. Xususan, bu yil 45 gektar maydonga takroriy ekin sifatida mosh ekilgan.

Shu erda qishloq xo`jaligi sohasi vakillari va mutasaddilari bilan muloqot bo`ldi. Davlat rahbari innovasiya va nav evaziga hosildorlikni oshirish, suvdan oqilona foydalanish va hisobini yuritish zarurligini ta`kidladi. Fermer va ishchilarning maishiy sharoitlarini yaxshilash, xususan, ular uchun kichik, arzon uylar qurish bo`yicha ko`rsatma berildi.

Sharhlar