Jizzaxda nazorat-tekshiruv postiga tungi xizmatga ketayotgan IIB xodimi avtohalokatga uchrab vafot etdi. Bu haqda "Zamon" dasturida xabar qilindi.
Ma`lum qilinishicha, Jizzax viloyati Sharof Rashidov tumani "Uchtepa" mahallasida yashovchi Hasanxon Shukurullaev viloyat IIB boshlig`ining farmoyishiga asosan Zarbdor tumani "Yangikent" mahallasida tashkil etilgan nazorat-tekshiruv postiga tungi xizmatga ketayotgan bo`lgan. Biroq uning "Jiguli" avtomobilining o`ng tomon shinalari texnik shikastlanishi oqibatida boshqaruvni yo`qotib, dala maydoni chetiga ag`darilgan va leytenant Shukurullaev olgan tan jarohatlari oqibatida hodisa joyida vafot etgan.
Marhumning otasining aytishicha, IIB xodimi ikki kun avval leytenant unvonini olgan, ammo hali pоgonni taqishga ham ulgurmagan.
