AQShda Galaxy Note 7 smartfonlari sotilishi boshlanganidan beri ularning yonib ketishi bilan bog`liq 70 dan ortiq holat qayd etildi, deb yozadi “Tjournal” Kanada hukumati va Samsung kompaniyasining axborotiga asoslanib.
Hozirgi kunga qadar dunyo bo`yicha Note 7 smartfonlarining yonishi bilan bog`liq 35 ta holat qayd etilgan edi.
Biroq 13 sentyabrda Kanada hukumati saytida yangilangan ma`lumotlar paydo bo`ldi. Health Canada va Samsung Canada bir marta smartfon batareyasi yonib ketganini aniqladi. Yong`in oqibatida hech kim jabrlanmagan.
Ma`lumotlarga ko`ra, Kanadaning o`zida Note 7 smartfonlari sotila boshlanganidan so`ng tezda qaytarib berish shart bo`lgan 21 953 ta apparat sotilgan.
Hozirgi paytda Note 7 smartfonlarini o`nlab aviakompaniyalar samolyotlarida quvvatlantirish va undan foydalanish taqiqlangan.
Samsung kompaniyasi esa mijozlarni xavfli uskunalardan himoya qilish maqsadida masofadan turib mazkur qurilmalarni o`chirish rejasini ko`rib chiqmoqda.