Xabaringiz bor, davlatimiz rahbari Shavkat Mirziyoev 26-27 yanvar kunlari Qirg`iziston Respublikasi Prezidenti Sadir Japarovning taklifiga binoan davlat tashrifi bilan Qirg`izistonda bo`ldi.
Kuni kecha Markaziy Osiyo xalqaro institutida O`zbekiston Respublikasi Prezidenti Shavkat Mirziyoevning Qirg`iziston Respublikasiga davlat tashrifi yakunlariga bag`ishlangan "O`zbekiston va Qirg`iziston: strategik sheriklikning yangi istiqbollari" mavzusida davra suhbati bo`lib o`tdi.
Tadbirda Qirg`iziston Respublikasi tashqi ishlar vaziri, Qirg`izistonning O`zbekistondagi Favqulodda va muxtor elchisi, O`zbekiston Respublikasi Oliy Majlisi Qonunchilik palatasining Xalqaro ishlar va parlametlararo aloqalar qo`mitasi raisi, O`zbekiston tashqi ishlar vaziri o`rinbosari hamda ikki mamlakat etakchi tahlil markazlari ekspertlari ishtirok etdi.
Markaziy Osiyo xalqaro instituti direktori Vladimir Norov “O`zbekiston va Qirg`iziston: Strategik sheriklikning yangi istiqboli” mavzusida bo`lib o`tgan davra suhbatida ta`kidlaganidek, davlatimiz rahbarining Qirg`iz Respublikasiga davlat tashrifi ikki mamlakat o`rtasidagi munosabatda “tarixiy burilish” voqeasi bo`ldi.
Institut direktori yuksak darajadagi muzokaralar yakuni bo`yicha hamkorlikning, deyarli, barcha sohalarini qamrab olgan 25 ta hujjat imzolanganini qayd etdi.
Davlat rahbarlarining qat`iy siyosiy irodasi, birgalikdagi sa`y-harakati samarasi o`laroq davlatlaro chegaraning ayrim uchastkalari to`g`risida shartnoma imzolandi. Ushbu hujjat Markaziy Osiyodagi asosiy diplomatik yutuqdir.
Ko`p yillar davomida davlatlararo keskinlik manbasi bo`lib kelgan, ikki tomonlama hamkorlikning to`liq salohiyatidan foydalanishga, Markaziy Osiyoda tinchlik o`rnatish va barqaror rivojlanishni ta`minlashga to`sqinlik qilayotgan delimitasiya masalasi nihoyat to`liq tartibga solingani e`lon qilindi.
Prezident Shavkat Mirziyoev qayd etganidek, “Chegarani delimitasiya qilish masalasi to`liq tartibga solingani ikki tomonlama hamkorlik va hududlar aro almashinuv rivojida muhim o`rin tutadi, mintaqamizda barqarorlik va xavfsizlik mustahkamlanishiga xizmat qiladi”.
Ayni dam Qirg`iziston Prezidenti Sadir Japarov O`zbekiston-Qirg`iziston chegarasini delimitasiya qilish bo`yicha muhim masalalarni hal etishda Shavkat Mirziyoevning beqiyos rolini ta`kidlar ekan, “Qirg`iziston uchun O`zbekiston – ruhan yaqin qo`shni, sadoqatli do`st va ishonchli strategik hamkor” ekanini alohida qayd etdi.