Ozarbayjon Respublikasi Prezidenti Ilhom Alievning taklifiga binoan O`zbekiston Respublikasi Prezidenti Shavkat Mirziyoev rafiqasi bilan birga davlat tashrifi bilan Boku shahriga keldi.
Haydar Aliev nomidagi aeroportda davlatimiz rahbarini Ozarbayjon Bosh vazirining birinchi o`rinbosari Yaqub Ayubov va boshqa rasmiy shaxslar kutib oldi. Oliy martabali mehmon sharafiga faxriy qorovul saf tortdi.
Dastlab Mirziyoev rafiqasi bilan birga “Shahidlar” xiyobonini ziyorat qilgan. Shuningdek, “Mangu alanga” monumenti poyiga gul qo`ygan.
O`zbekiston Prezidenti “Shahidlar” xiyoboni tarixi va Ozarbayjon poytaxtidagi obodonlashtirish ishlari bilan tanishar ekan, Bakuning panoramali manzarasidan bahramand bo`ldi.
Bugun bo`lib o`tadigan oliy darajadagi uchrashuvlarda ikki mamlakat etakchilari O`zbekiston-Ozarbayjon strategik sheriklik munosabatlarini yanada chuqurlashtirish va ko`p qirrali hamkorlikni, eng avvalo, siyosiy, savdo-iqtisodiy, transport-kommunikasiyaviy va madaniy-gumanitar sohalarda rivojlantirish masalalarini muhokama qiladilar.
