Bugun, 16 aprel Florensiyaning Palazzo Pittidagi Uffisi galereyasida “O`zbekiston: Sahrodagi avangard” yirik ko`rgazmasining "Nur va rang" nomli birinchi qismi ochildi.
“O`zbekiston: sahrodagi avangard” ko`rgazma loyihasining Florensiya bo`limi “Nur va rang” deb atalib, asosiy diqqat-e`tibor Turkistonda 1917 yilgacha ijod qilgan rus Sharq ixlosmandlaridan boshlab to madaniyatlararo muloqot va almashinuv natijasida O`zbekistonda shakllangan milliy rangtasvirchilik maktabi namoyandalari bilan yakunlangan XX asrning birinchi yarmi san`atidagi Markaziy Osiyo qiyofasiga qaratilgan.
Ertaga, 17 aprelda Venesiyadagi Ka Foskari universitetining ko`rgazmalar maydonida “Shakl va ramz” ko`rgazmasining Venesiya qismi o`z ishini boshlaydi.
“O`zbekiston: Sahrodagi avangard” ko`rgazmasining “Nur va rang” bo`limi 2024 yil 16 apreldan 30 iyungacha Florensiyadagi Pitti saroyida ochiq bo`ladi.
“Shakl va ramz” loyihasi 17 apreldan 29 sentyabrgacha Venesiyadagi Ka Foskari universitetining ko`rgazma maydonida muxlislar uchun ochiq.
