Бугун, 16 апрель Флоренциянинг Палаззо Питтидаги Уффици галереясида “Ўзбекистон: Саҳродаги авангард” йирик кўргазмасининг "Нур ва ранг" номли биринчи қисми очилди.
“Ўзбекистон: саҳродаги авангард” кўргазма лойиҳасининг Флоренция бўлими “Нур ва ранг” деб аталиб, асосий диққат-эътибор Туркистонда 1917 йилгача ижод қилган рус Шарқ ихлосмандларидан бошлаб то маданиятлараро мулоқот ва алмашинув натижасида Ўзбекистонда шаклланган миллий рангтасвирчилик мактаби намояндалари билан якунланган ХХ асрнинг биринчи ярми санъатидаги Марказий Осиё қиёфасига қаратилган.
Эртага, 17 апрелда Венециядаги Ка Фоскари университетининг кўргазмалар майдонида “Шакл ва рамз” кўргазмасининг Венеция қисми ўз ишини бошлайди.
“Ўзбекистон: Саҳродаги авангард” кўргазмасининг “Нур ва ранг” бўлими 2024 йил 16 апрелдан 30 июнгача Флоренциядаги Питти саройида очиқ бўлади.
“Шакл ва рамз” лойиҳаси 17 апрелдан 29 сентябргача Венециядаги Ка Фоскари университетининг кўргазма майдонида мухлислар учун очиқ.
