«Yoshim 50da. Shu kungacha husnbuzarlar o`smirlarning muammosi deb yurarkanman. Biroq yaqinda yuzimga mayda oq husnbuzarlar tosha boshladi. Bir-ikki niqoblar qilib ko`rdim, befoyda. Ko`rinishidan xuddi husnbuzarga o`xshaydi, faqat hajmi sal kichikroq. Ammo siqib bo`lmayapti. Ulardan qanday xalos bo`lish mumkin. Uy sharoitida ulardan xalos bo`lish mumkinmi?»
Marg`uba, Andijon viloyati
Mushtariymizning savoliga tajribali kosmetolog Mahbuba MAMANOVA bilan birgalikda javob beramiz.
Milium — husnbuzar emas?
Mushtariymiz ta`rifini keltirgan tariqqa o`xshash oq toshmalar kosmetologiyada milium deb nomlanadi. Asosan ko`z atrofi, qovoq va peshana sohasida uchraydi. Bilasiz, inson terisi ostida mayda yog` bezlari mavjud bo`lib, ular tabiiy «krem» ishlab chiqarib, yuzimizni yumshatadi va himoyalaydi. Agar teri katakchalari tiqinlar bilan to`lib qolgan bo`lsa, mana shu yog` tashqariga chiqa olmay, yig`ilib qoladi. Natijada yuz terisida oq yoki sarg`ish tusdagi bo`rtib chiqqan toshmalar yuzaga keladi. Ko`p hollarda tiqinlarga kosmetik vositalardan noto`g`ri foydalanish ham sabab qilib ko`rsatiladi. Garchi, miliumlarning salomatligimizga hech qanday ziyoni bo`lmasa-da, estetik jihatdan noqulaylik tug`diradi. Shuningdek, bunday toshmalar husnbuzarlardan farqli o`laroq o`z o`zidan so`rilib ketmaydi.
Qo`l tekkizmang!
Miliumlarni siqish qat`iyan taqiqlanadi. Agar shunday qilsangiz, teri ostidagi yog` bezlari faoliyati izdan chiqadi va yiringli husnbuzar tosha boshlaydi. Oqibatda dog` va chandiqlar paydo bo`ladi. Miliumni, albatta, dermotolog yoki kosmetolog shifokor bartaraf etishi lozim. Shuningdek, muammodan turli krem yoki niqoblar yordamida qutulaman deb o`ylayotgan bo`lsangiz, ortiqcha xarajatga tushganingiz qoladi, xolos. Bunday hollarda kosmetolog ko`magiga tayanib, ish ko`rsangiz yutqazmaysiz. Bugungi kunda miliumlardan xalos bo`lishning uch usuli keng tarqalgan.
Mexanik usul
Agar toshmalar u qadar ko`p bo`lmasa, mutaxassis mexanik usulga murojaat qilishni afzal bilishi mumkin. Bunda teriga antiseptik vosita bilan ishlov berilib, miliumlarning yuzasi sterillangan igna yordamida teshiladi va maxsus o`rtasi teshik qoshiqcha (ba`zan esa qo`l) bilan yog` siqib chiqariladi. Infeksiya tushish xavfi tufayli uy sharoitida bu amaliyotni o`tkazish tavsiya etilmaydi. Muolajadan so`ng terida kichik yarachalar qoladi. Terini haddan ortiq jarohatlamaslik uchun esa bir kunda 10 tagacha toshmaga mexanik usulda ishlov berish o`tkazilishi mumkin.
Elektorkoagulyasiya
Odatda yog` chuqurroq joylashgan bo`lsa, bu usulga murojaat qilinadi. Elektrokoagulyasiyada toshmaga o`zgaruvchan chastotali toklar yordamida ta`sir o`tkaziladi. Amaliyotdan keyin hosil bo`lgan yaralar bir-ikki kundan so`ng izsiz yo`qoladi. Muolajadan so`ng uyda ham antiseptik vositalar bilan ishlov berib turish tavsiya etiladi.
Lazerli yoki ultratovushli koagulyasiya
Zamonimizning eng oldi texnologiyalari muammongizni osongina hal etadi. Bajarish texnikasi yuqoridagi usulga o`xshab ketsa-da, lazer nurlari odatda toshmalar haddan tashqari ko`p bo`lganida va tozalash qiyin hududlarda joylashganda foyda beradi. Yaxshi tomoni esa muolajadan keyin yaralar va dog`lar chiroyingizga soya solmaydi.
Oldini olish uchun...
Toshmalarni aynan qanday omillar keltirib chiqarishi oxirigacha o`rganilmagan. Shu bois oldini olish choralariga to`g`ri ovqatlanish va sog`lom turmush tarziga rioya qilishni kiritish mumkin. Eng muhimi, kechasi uxlashdan avval yuzni yuvish, bunda sifatli loson va boshqa terini tozalash vositalaridan foydalanish tavsiya etiladi.
MAFTUNA tayyorladi.
23.08.2021, 16:08
Qishning qirovli kunlaridan eson-omon chiqib olgan Komiljon ota kenja farzandi Murodni (ism-shariflar o`zgartirilgan) uylash maqsadida to`y tayyorgarliklarini boshlab yubordi. Uzoq izlanishlardan so`ng qiz ham topildi. Biroq unashtiruv...01.06.2021, 18:32
So`nggi vaqtlarda ijtimoiy tarmoqlarda xotin-qizlarning tahqirlanishi, ayovsiz kaltaklanish holatlari aks etgan xabar va voqealar haqidagi chiqishlar keskin ortib ketdi. Ammo bu kabi vaziyatlar kechagina sodir...13.05.2021, 22:34
Farg`ona viloyati Marg`ilon shahrida 32 yashar ayol uyining tomorqasida ko`knori o`simligi etishtirayotgani aniqlandi, deya xabar bermoqda IIV matbuot xizmati.Qayd etilishicha, 2021 yilning 5 may kuni...03.12.2020, 19:22
Insoniyatning etnik xilma-xilligini o`rganish uchun "Go`zallikning kelib chiqishi" nomli loyiha tashkil etildi. Millatlar go`zalliklari o`rtasidagi tafovutni namoyon etish uchun turli mamlakat vakillari suratga tushirilmoqda.Loyihada 18 yoshdan...