Falastinning muvaqqat prezidenti tayinlandi. Falastin muxtoriyati rahbari Mahmud Abbos, agar biror sababga ko‘ra o‘z vazifasini bajara olmasa, uning vakolatlari va vazifalari Falastin milliy kengashi rahbari Ravhi Fattuhga o‘tishini aytdi.
Isroilning Jerusalem Post gazetasi yozishicha, Mahmud Abbos “agar bu lavozim bo‘shab qolsa” uning o‘rniga Ravhi Fattuh tayinlanishini e’lon qilgan. Fattuh 90 kunlik vakolatga ega bo‘ladi, bu muddat davomida saylov o‘tkazilishi kerak.
Mahmud Abbosning yaqin ittifoqchisi bo‘lgan Fattuh o‘nlab yillar davomida “Fath”partiyasining parlament blokini boshqargan muhim siyosiy maslakdosh hisoblanadi.
Mahmud Abbos qarorida ta’kidlashicha, agar saylovlar o‘tkazilmasa, Falastin Markaziy Kengashi (FMK) uning vakolatlarini yana 90 kunga uzaytirishni tanlashi mumkin, ammo undan ko‘pga emas.
FKK Falastin Ozodlik Tashkilotining siyosiy faoliyatini belgilab beruvchi idoralardan biri hisoblanadi. Hozirda Ravhi Fattuh unga raislik qiladi.
Fattuh bundan avvalroq, 2004 yilda Yosir Arofat vafotidan keyin biroz muddat muvaqqat prezident lavozimida ishlagan: u 2004 yilning noyabridan saylovlar bo‘lib o‘tgan yanvar oyigacha bu lavozimda faoliyat yuritgan edi.
2022 yilda Haaretz nashrining tahlilchisi Jek Huri, Abbosning ehtimoliy vorislari ko‘rib chiqilayotganda Ravhi “zerikarli va siyosiy ta’siri yo‘q yoki hukmronlik qilish qobiliyatiga ega bo‘lmagan” nomzod sifatida ko‘rilganini aytgan edi.
Ma’lumot uchun, Ravhi Fattuh 1949 yilda G‘azo sektoridagi Rafah qochqinlar lagerida tug‘ilgan. 1968 yilda Fathning qurolli qanoti - keyinchalik “Al-Aqso shahidlari brigadasi” deb nomlangan “Al-Asifa” guruhiga qo‘shilgan. Shundan so‘ng u 1970 yilda o‘rta maktabni tamomlash Iordaniyaga qaytdi, keyin esa harbiy tayyorgarlik uchun Iroqqa yuborildi.
Fattuh 1979 yilda Damashq universitetini ingliz tilida o‘qib chiqib, bakalavr diplomini olgan.
Ta’kidlash lozim, Mahmud Abbos va ma’muriyatining Falastinni boshqarish va himoya qilish borasidagi huquqlari Isroil tomonidan maksimal darajada cheklangan.
Masalan, 2024 yil 22 avgust kuni Mahmud Abbos G‘azo sektoriga borib, vaziyatni o‘rganmoqchi bo‘lganida, Isroil hukumati bunga ruxsat bermagan edi.
Falastin Tashqi ishlar vaziri Riyod al-Malikiy “bu holat G‘azo sektori ham Isroil tomonidan to‘laqonli istilo qilinganini isbotlaydi” degan edi o‘shanda.
