Davlat xavfsizlik xizmati va huquqni muhofaza qiluvchi organlar hamkorligida o‘tkazilgan tezkor tadbirlarda poytaxt va viloyat hududida noqonuniy dori savdosi bilan shug‘ullangan shaxslar qo‘lga olindi.
Ma’lum qilinishicha, Zangiota tumanida yashovchi 1996 yilda tug‘ilgan shaxs va uning samarqandlik tanishi Toshkent shahrida to‘xtatilib tekshirilganda, ularning yonidan 8400 dona “Regapen” dori vositasi topilgan.
Shuningdek, Chilonzor tumanidagi vaqtincha ombor sifatida foydalanilgan xonadondan yana 12600 dona “Regapen”, 10 ming dona qo‘lbbola usulida tayyorlangan dorilar, 500 dona idish va mini-printer ashyoviy dalil sifatida olingan.
Yana bir holatda esa 1994 yilda tug‘ilgan shaxs 6 dona “Zardeks”ni 600 ming so‘mga sotgan vaqtida ushlangan. Tergov davomida unga dori yetkazib berib turgan, muqaddam sudlangan namanganlik fuqaro ham qo‘lga olindi. Uning avtomashinasidan 12400 dona “Zardeks” va 14 dona “Regapen” musodara qilindi.
Har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.
