Sevimli olive
Yangi yilga yangicha usulda tayyorlang!
Zarur masalliqlar: 7 bo`lak qaynatilgan mol go`shti yoki tili, 6 ta tuzlangan bodring, 5 ta qaynatilgan tuxum, 1 ta kichkina bosh piyoz va qaynatilgan kartoshka, 2 osh qoshiq konservalangan ko`k no`xat, un, o`simlik yog`i, mayonez, shivit, tuz.
Tayyorlanishi: 1. Qaynatilgan mol tili bo`laklarini likopchaga aylana shaklida terib chiqing.
2. Piyozni yupqalab halqa shaklida to`g`rang. Un sepib, qizdirilgan o`simlik yog`ida qovurib oling.
3. Qaynatilgan kartoshka, tuzlangan bodring va 2 dona qaynatilgan tuxumni to`rtburchak shaklda maydalab to`g`rang. Shivitni maydalang. Masalliqlarni aralashtirib, konservalangan ko`k no`xat qo`shing. Tuz sepib, mayonez solib aralashtiring.
4. Mol tili ustidan salatni chiroyli qilib solib, atrofini qolgan tuxumlari bilan bezab chiqing.
Tayyorlanish vaqti: 45 daqiqa.
«Atirgul» salati
Qishda ham bahoriy kayfiyat
Zarur masalliqlar: 400 gr. qaynatilgan yog`siz go`sht, 250 gr. konservalangan qo`ziqorin, 1 ta qizil bulg`or qalampiri, ko`k piyoz, zaytun mevasi (donaksiz). Qayla uchun: 1 stakandan kamroq smetana, 2 osh qoshiq limon sharbati, maydalangan qalampir, tuz.
Tayyorlanishi: 1. Go`sht va qo`ziqorinni somoncha shaklida yupqalab, bulg`or qalampiri hamda ko`k piyozni maydalab to`g`rang. Keyin masalliqlarni aralashtiring.
2. Smetanaga tuz, maydalangan qalampir va limon sharbati soling. Qaylani salatga qo`shib, yaxshilab aralashtiring. Salatni zaytun mevasi va tuzlangan qo`ziqorin bilan bezating.
Tayyorlanish vaqti: 50 daqiqa.
«1 yanvar» yaxna taomi
Seld balig`i go`shtidan…
Zarur masalliqlar: 100 gr. seld balig`i, 2 donadan kartoshka va tuxum, 1 tadan sabzi va lavlagi, ko`k piyoz.
Tayyorlanishi: 1. Sabzavotlarni qaynatib oling. Po`stlaridan tozalab, ezing. Mayonez qo`shing. Tuxumni ham qaynatib, qirg`ichdan o`tkazing-da, mayonez qo`shing.
2. Sellofan yoyib, ustiga maydallangan ko`k piyoz seping. Keyin seld balig`i bo`laklarini qo`ying. Ustidan sabzavotli bo`tqa va tuxumni soling. Tuz seping. Keyin ehtiyotkorlik bilan o`rab, muztalkichga qo`ying. Qotgach, o`rtacha kattalikda kesib, dasturxonga torting.
Tayyorlanish vaqti: 2 soat.
Ajoyib egulik
Baqlajon va go`shtli «duet»
Zarur masalliqlar (4 kishilik): 800 gr. go`sht, 100 gr. pishloq, 2 ta baqlajon, 1 bosh piyoz, 6 osh qoshiq o`simlik yog`i, tuz, qora murch.
Tayyorlanishi: 1. Baqlajonni 1 sm.lik qalinlikda aylana shaklda kesing. Tuz solingan suvga 20 daqiqaga solib qo`ying. Keyin suvini yaxshilab silqitib, 3 osh qoshiq qizdirilgan o`simlik yog`ida qovurib oling.
2. Piyozni halqa, go`shtni kattaroq qilib to`g`rang.
3. Qolgan o`simlik yog`ini qizdirib, go`shtning qovuring. Keyin qopqog`ini pasaytirib, 10 daqiqa past olovda qoldiring.
4. Pishloqni qirg`ichdan o`tkazing. Baqlajonning ustiga go`sht bo`laklarnini qo`yib, tuz, murch seping-da, pishloq qirindisini ham soling. 170 darajada qizdirilgan gaz pechiga 15 daqiqaga qo`yib oling.
Tayyorlanish vaqti: 1 soat.
«Ananas» salati
Fantaziyani ishga soling, kelinchaklar!
Zarur masalliqlari (4-6 kishilik): 200 gr. qaynatilgan tovuq go`shti, 4 ta kartoshka, 2 ta qaynatilgan tuxum sarig`i, 1 bosh piyoz, 1 osh qoshiq smetana, o`simlik yog`i. Bezak uchun: 150 sariyog`, 6 ta ko`k piyoz, 2 ta qaynatilgan tuxum oqi, 1 ta qaynatilgan sabzi.
Tayyorlanishi: 1. Kartoshkani qaynatib, tozalab, ezing. Piyozni to`rt bo`lakka bo`ling. Tuxum sarig`i, qaynatilgan tovuq go`shti va piyozni go`shtqiymalagichdan o`tkazing. Kartoshkali bo`tqaga qo`shing-da, smetana solib, aralashtiring. Qo`lingizga o`simlik yog`i surtib, likopchaga aralashmani soling-da, ananas shaklini yasang.
2. Sariyog`ni konditer qopchasiga solib, ananas atrofini kichkina gulchalar bilan bezab chiqing. Sabzini maydalab to`g`rab, sariyog`li gullarga yopishtiring. O`rtasiga esa ko`k piyoz bargini solib qo`ying. Atrofini tuxum oqi bo`laklari, sabzi va shivit bilan bezating.
Tayyorlanish vaqti: 50 daqiqa.
«Dengiz yulduzi»
Archagamas, dasturxoningizga bezak!
Zarur masalliqlar (4-6 kishilik): 250 gr. dudlangan go`sht (kolbasa), 200 gr. tuzlangan qo`ziqorin, 100 gr. pishloq, 3 ta qaynatilgan tuxum, 1 tadan pomidor va tuzlangan bodring. Qayla uchun: mayonez, yarim choy qoshiq qalampir. Bezak uchun: salat bargi, yarim banka tuzlangan zaytun mevasi, 4-5 ta qisqichbaqa tayyoqcha.
Tayyorlanishi: 1. Dudlangan go`shtni to`rtburchak shaklda to`g`rang. Qaynatilgan tuxumning sarig`i va oqini ajrating. Pishloq va tuxum oqini qirg`ichdan o`tkazing.
2. Tuzlangan qo`ziqorinlardan bezak uchun olib qo`yib, qolganini maydalab to`g`rang.
3. Pomidor va bodringni to`rtburchak shaklda maydalab to`g`rang. Qalampirni mayonez bilan aralashtiring. Barcha masalliqlarni aralashtirib, mayonezli qaylani soling.
4. Salatni salat bargi ustidan yulduzcha shaklida solib chiqing. Yuziga maydalangan tuxum sarig`i seping. Keyin qisqichbaqa tayyoqchalarini bo`laklab, ular bilan yulduzli salatni bezating. Atrofiga tuzlangan qo`ziqorinlarni qo`yib chiqing.
Tayyorlanish vaqti: 45 daqiqa.
10.12.2021, 10:32
Har yili uzoq kutiladigan Yangi yil ayyomiga sanoqli kunlar qoldi. Toshkentda esa bayram tantanalarini nishonlash uchun tayyorgarlik ishlari allaqachon boshlab yuborilgan. Eng baland sanalgan yurtimizning...
27.12.2019, 17:33
Insonlar Yangi yil bayramini odatda qorli sovuq ob-havo bilan kutib olishni xohlaydilar.Biroq boshqa janubiy o`lkalar kabi O`zbekiston aholisi ham har doim Yangi yilni qor bilan...
17.12.2019, 22:10
Qashqadaryodagi tashkilot, korxona va muassasalar binolarini yangi yil arafasida bayramona bezalganlik darajasini aniqlash maqsadida viloyat hokimligi tomonidan “Eng yaxshi yangi yil manzarasi” tanloviga start berildi,...
26.11.2019, 17:14
Istiqlol ko`chasidagi Alisher Navoiy nomidagi kutubxonada yonida odatdagidan ko`ra erta Toshkentning asosiy yangi yil archasi o`rnatila boshlandi.Darakchi.uz tahririyatiga yuborilgan suratlardan ko`rinib turibdiki, Archaning karkasi o`rnatib...
