Blogerning aytishicha, 1956 yilda tug‘ilgan, II-guruh nogironi bo‘lgan otasi 10 aprel kuni sirli tarzda yo‘qolgan. Bir sutkalik qidiruvlardan so‘ng u Samarqand tumanidagi ruhiy xastalar shifoxonasida ekani aniqlandi. Oila a’zolarining ta’kidlashicha, bemor u yerga Ichki ishlar organlari xodimlari tomonidan olib borilgan va bu haqda yaqinlariga xabar berilmagan.
Temur Malik shifoxonada otasiga kuchli ta’sir qiluvchi dori vositalari qo‘llanganini iddao qilib, u uyga qaytarilgach bir sutka davomida hushiga kelmay yotgani va 14 aprel kuni vafot etganini bildirgan. Marhum so‘nggi yillarda alsgeymer kasalligi bilan og'rib kelgan.
Hozirda holat yuzasidan viloyat prokuraturasiga ariza kiritilgan bo‘lib, sud-tibbiyot ekspertizasi tayinlangan. Bosh prokuratura matbuot xizmati ham mazkur voqea bo‘yicha tergovga qadar tekshiruv harakatlari olib borilayotganini ma’lum qilib, yakunda qonuniy qaror qabul qilinishini bildirgan.
