Angliya terma jamoasi yarim himoyachisi Jud Bellingem Jahon chempionati-2026 yarim finalida Argentinaga 1:2 hisobida mag‘lub bo‘lgan uchrashuvdan keyin Lionel Messi bilan maydondagi muloqoti yuzasidan izoh berdi.
Bellingemning aytishicha, ijtimoiy tarmoqlarda muhokama qilinayotgan suhbatda hech qanday janjal yoki haqorat bo‘lmagan.
"Messi bilan bo‘lgan suhbatimiz aslida qoidabuzarlik haqida edi. Hech qanday yomon gap bo‘lmadi. Ishonchim komilki, ko‘pchilik bu holatni bo‘rtirib ko‘rsatishga harakat qiladi, lekin aslida hech narsa bo‘lmagan.
Men avvalroq bir vaziyatda qoidabuzarlik bo‘lgan deb o‘ylagandim. U esa: "Menga nisbatan bo‘lgan vaziyat haqida nima deysan?" deb so‘radi. Men unga: "Sen bunday holatga chiday oladigan darajada kuchlisan", deb javob berdim", dedi Bellingem.
U, shuningdek, Lionel Messiga qarshi maydonga tushish o‘zi uchun katta sharaf bo‘lganini ta'kidladi.
"Albatta, biz mag‘lub bo‘ldik va bu juda og‘ir. Lekin dunyoning eng yaxshi futbolchilaridan biriga qarshi o‘ynash men uchun katta sharaf. Messiga omad tilayman", dedi u.
Bellingem Angliya terma jamoasi kelajakda yana sovrin uchun kurashishini ham qayd etdi.
"Biz yana qaytamiz. Angliyaga kubok olib kelish uchun qo‘limizdan kelgan barcha ishni qilamiz. Bu mag‘lubiyat juda alamli. Men Angliya bilan tarix yaratgan jamoaning bir qismi bo‘lishni istagandim.
Muxlislarga yillar davomida eshitib kelgan gaplarni yana takrorlash juda og‘ir. Bugun biz uchun qayg‘uli kun. Biz yaxshi o‘ynadik, bor kuchimiz bilan kurashdik, ammo bu yetarli bo‘lmadi.
Hozir fikrlarimni faqat umidsizlik egallab turibdi. Muxlislarimizdan uzr so‘rayman", deya so‘zini yakunladi angliyalik futbolchi.
