Farg`ona viloyatida 16 kishiga fuqarolik pasporti topshirildi

Prezidentimiz Shavkat Mirziyoevning 2016 yil 20 dekabrdagi “O`zbekiston Respublikasi fuqaroligiga qabul qilish to`g`risida”gi farmoniga muvofiq O`zbekiston fuqaroligi berilgan shaxslarga O`zbekiston Respublikasi pasporti topshirilmoqda. Farg`ona viloyatida 16 kishiga fuqarolik pasporti tantanali ravishda topshirildi. Bu haqda O`zA xabar bermoqda. 

Bosh qomusimizda O`zbekiston Respublikasining fuqaroligiga qanday asoslarda ega bo`lganlikdan qat`i nazar, mamlakatimizning barcha hududlarida hamma uchun teng bo`lgan yagona fuqarolik belgilab qo`yilgan. Fuqarolik davlat tomonidan barcha shaxsiy, siyosiy, iqtisodiy, ijtimoiy huquq va erkinliklarni ta`minlashning asosi hisoblanadi. 

O`zbekiston konstitusiyaviy normalarni hayotga tatbiq etish doirasida O`zbekiston Respublikasining hududi va uning tashqarisida o`z fuqarolarining huquqiy himoyasi va muhofazasini ta`minlaydi. Fuqarolik pasportimizning so`nggi beti – muqovasi ichiga “Pasport O`zbekiston Respublikasi mulkidir. Ushbu pasportning egasi O`zbekiston Respublikasi himoyasidadir”, degan so`zlar o`zbek va ingliz tillarida bitilgan. 

Prezidentimizning yuqoridagi farmoni xalqimiz tomonidan xursandchilik bilan kutib olindi. Farg`ona shahrida o`tkazilgan tadbirda yuksak sharafga, maqomga ega bo`lganlar o`zlarining mamnuniyat va shukronalarini bildirdi.