30 yanvar O`zbekistonning Birinchi Prezidenti Islom Karimov tavalludi kuni munosabati bilan mamlakatimizdagi ta`lim muassasalari, harbiy qismlar, mehnat jamoalari va mahallalarda turli madaniy-ma`rifiy tadbirlar, xotira kechalari o`tkazilmoqda.
Ushbu tadbirlarda Islom Karimovning serqirra siyosiy faoliyati, olijanob insoniy fazilatlari bilan Vatanimizning ko`p asrlik tarixida o`chmas iz qoldirgani, nafaqat O`zbekiston, balki jahon miqyosida katta hurmat va obro`-e`tiborga sazovor bo`lgan ulkan shaxs va arbob sifatida tanilgani e`tirof etilmoqda.
Davlatimiz rahbarining 2017 yil 25 yanvardagi "O`zbekiston Respublikasining Birinchi Prezidenti Islom Abdug`anievich Karimovning xotirasini abadiylashtirish to`g`risida"gi qarori xalqimiz ko`nglidagi niyatning yorqin ifodasi bo`ldi.
Birinchi Prezidentimiz Islom Karimov tavalludi sanasi – 30 yanvar kuni poytaxtimiz Toshkentda, Qoraqalpog`iston Respublikasi va barcha viloyatlarda ehson berildi. Samarqand va Toshkentdagi marosimlarda Prezidentimiz Shavkat Mirziyoev ishtirok etdi, deb yozadi O`zA.
