Sirdaryo viloyati Oqoltin tumanidagi “Gulsanam” to`yxonasida 10 bolaning sunnat to`yi o`tkazildi. Bu haqda O`zA xabar bermoqda.
Tadbirda Prezidentimiz rahnamoligida xalq bilan muloqot qilishning o`ziga xos tizimi yo`lga qo`yilgani fuqarolar muammolarini o`rganish va joyida hal etish, aholining ijtimoiy himoyaga muhtoj qatlamini moddiy va ma`naviy qo`llab-quvvatlash, jamiyatda o`zaro mehr-oqibat, hamjihatlik va xayr-saxovat muhitini yanada mustahkamlashga xizmat qilayotgani ta`kidlandi.
“Xalq bilan muloqot va inson manfaatlari yili” Davlat dasturi ijrosi doirasida inson manfaatlarini himoya qilish, xalqimizga xos ezgu ishlar ko`lamini yanada kengaytirish maqsadida O`zbekiston Kasaba uyushmalari federasiyasi, Sirdaryo viloyati hokimligi, viloyat kasaba uyushmalari tashkilotlari birlashmasi, xotin-qizlar qo`mitasi, Oqoltin, Sardoba tumanlari hokimliklari va qator tashkilotlar hamkorligida o`tkazilgan sunnat to`yida bolalarning ota-onalari, qarindosh-urug`lari, mahalla faollari, mehnat faxriylari, keng jamoatchilik vakillari ishtirok etdi.
To`y bolalarga viloyat hokimligi, homiy tashkilotlarning sovg`alari, turli mavzulardagi kitoblar to`plami, bolalar velosipedi, shirinliklar hamda Xalq banki viloyat filialida ular nomiga ochilgan hisobraqamiga 1 million so`mdan pul mablag`i o`tkazilgan jamg`arma omonat daftarchasi tantanali ravishda topshirildi.
“Qo`limga o`g`lim Firdavsjonning nomiga 1 million so`m mablag` o`tkazilgan omonat daftarchasini topshirishganda, avvaliga ishonmadim. Yo`q, rost ekan. Darrov hisobladim. Bu mablag` 20 yildan so`ng 40 million bo`lar ekan. Biz onalar o`shanda farzandlarimizning nikoh to`ylarini ham birga o`tkazib, elga osh berishni niyat qildik. Onalari e`zozda, farzandlari g`amxo`rlikda bo`lgan yurt fuqarosi ekanimdan faxrlanaman”— deydi Sardoba tumani Qo`ytosh mahallasida istiqomat qiluvchi Mahbuba Hayitova quvonch ko`z yoshlarini yashirolmay.
Tadbirda Sirdaryo viloyati hokimi G`.Mirzaev so`zga chiqdi.
