— 23 yoshdaman. Asli toshkentlikman, lekin ayni damda Chexiya davlatida tahsil olayapman. Bir necha oy avval shifokorlar menga qalqonsimon bez faoliyati bilan bog`liq gormonlarning me`yoridan ortib ketishi tashxisini qo`yishdi. Chexiyaga ketishim kerak bo`lgani bois shifoxonada to`liq davolanolmadim. Davolovchi shifokorim menga Merkazolil preparatini buyurgandi. Ketish oldidan gormonlar tahlili tekshirilib, shifokor tomonidan preparat miqdori kamaytirildi. Shifokor ko`rsatmasiga ko`ra bu oyda ham gormonlarni tekshirish uchun tahlil topshirgandim. Lekin natijalarni taqqoslash uchun davolovchi shifokorim bilan bog`lana olmayapman. Preparat miqdorini kamaytirishim mumkinmi?
Gulshan, Chexiyadan
Natalya Ni, oliy toifali shifokor-endokrinolog: — Bu kasallikda gormonlar ko`p ishlab chiqilgani bois tireostatik preparatlar buyuriladi. Dori miqdori gormonlar statusiga ko`ra kamaytirilishi mumkin. Bu holatda bemorning umumiy ahvoli yoki boshqa shikoyatlari emas, aynan gormonlar darajasi tekshirilishi kerak. Muolaja davomiyligini nazorat qilish uchun T3, T4 gormonlarining erkin fraksiyalarini tekshirtirib, so`ng dori miqdori belgilanadi. Muolaja ta`siri samarali bo`lishi uchun 1,5-2 yil davomida muntazam tartibda olib borilsa, maqsadga muvofiq bo`ladi. Kasallikni qat`iy nazorat qilish uchun albatta shifokor nazorati kerak. Agar o`z bilganingizcha dori miqdorini kamaytirsangiz, noxush asoratlarga olib kelishi mumkin. Kasallikka noto`g`ri yondashilsa, qaytalanish xavfi bo`lib, asoratlari esa ayollarning reproduktiv salomatligiga ta`sir etmay qolmaydi. Eng ma`quli ta`tilga chiqqach, uyingizga qaytib, davolovchi shifokoringizga uchrang.
Manba: «SUG‘DIYONA» gazetasi.