Davlatimiz rahbari ikki yil muqaddam Uztex kompaniyalar guruhiga Shovot tumanining chekka hududida yuqori texnologik imkoniyatlarga ega mazkur korxonani tashkil etish va mahalliy aholini ish bilan ta`minlash yuzasidan topshiriqlar bergan edi.
O`tgan davrda ilgari mavjud bo`lgan korxona negizida ilg`or texnologiyalar bilan jihozlangan, mingdan ortiq ish o`rniga ega to`qimachilik korxonasi ishga tushirildi. Davlatimiz tomonidan tadbirkorlarga kredit olish, to`g`ridan-to`g`ri investisiyalarni jalb qilishda berilayotgan imtiyozlar korxona faoliyatini yo`lga qo`yishda qo`l keldi.
Loyiha qiymati 65 million dollar bo`lgan korxona faoliyati ikki bosqichda tashkil etildi. 2017 yilda amalga oshirilgan dastlabki bosqichda Italiyaning “Lonati” kompaniyasida ishlab chiqarilgan 528 ta, joriy yilda yana 512 ta paypoq to`qish dastgohi xarid qilindi. Ushbu dastgohlar Buyuk Britaniyaning “Maritex Industrial LLP” kompaniyasi tomonidan keltirib o`rnatildi.
Bugungi kunda korxonada turli o`lchamdagi ayollar, erkaklar va bolalar paypoqlari ishlab chiqarilmoqda. Yiliga 70 million juft, qiymati 30 million dollarlik paypoq tayyorlash quvvatiga ega qo`shma korxonada ishlab chiqarish jarayoni to`liq innovasion texnologiyalar asosida boshqariladi.
O`tgan yili korxonada 5,7 milliard so`mlik mahsulot ishlab chiqarilib, ichki bozorga yo`naltirildi. Joriy yildan to`la quvvat bilan ishlay boshlagan korxonada oktyabr oyi holatiga ko`ra 12,5 million juft paypoq to`qildi. 3,85 million dollarlik mahsulot AQSh, Rossiya, Moldova, Ukraina kabi qator mamlakatlarga eksport qilindi.
Davlatimiz rahbari korxona qoshida tashkil etilgan logistika markazi, to`quv, qadoqlash sexlari, laboratoriya faoliyati bilan tanishdi, ishchilarga yaratilgan shart-sharoitlar bilan qiziqdi.
Mazkur korxona texnologik imkoniyatlariga ko`ra dunyoda sanoqli, Markaziy Osiyoda yagona fabrikadir. Korxonada ayni kunda paypoq, sochiq kabi to`qimachilik mahsulotlarining yangi modellarini o`zlashtirish va eksport hajmini oshirish bo`yicha ish olib bormoqda.
Iqtisodiyotimizga qo`rqmasdan investisiya kiritish, ichki va tashqi bozorda raqobatbardosh mahsulotlar ishlab chiqarishni yo`lga qo`yish bo`yicha bergan tavsiyalarimiz tufayli bugun tadbirkordan qo`rquv yo`qoldi. Korxona quraman, ish o`rni yarataman degan ishbilarmonlarga hech qanday to`siq yo`q, biznes uchun barcha kafolatlar yaratilgan. Bundan xorijiy hamkorlar ham xabardor bo`lib, eksportga hissa qo`shmoqda, dedi davlatimiz rahbari.
Shu erda Xorazm viloyatida to`qimachilik sanoatini rivojlantirish, “Dererlop Textile” MChJ tomonidan “Hazorasp” erkin iqtisodiy zonasi hududida engil sanoat majmuasi tashkil etish, Shovot tumanida aralash va paxta ip-kalava ishlab chiqarish bo`yicha yangi yigiruv fabrikasi qurish, Urganch shahrida “Textile finanse Horezm” MChJ tomonidan tayyor trikotaj mahsulotlari ishlab chiqarish, Toshkent viloyati Parkent tumanida Uztex Zarkent sanatoriysini barpo etish loyihalari haqida ma`lumot berildi.
Davlatimiz rahbari engil sanoat tarmog`ini jadal rivojlantirish, mahsulot eksportini kengaytirish, qo`shimcha daromad manbalari va ish joyini ko`paytirish yuzasidan zarur ko`rsatmalar berdi.
