— 1969-1970 yillarda yadro poligonida xizmat qilganman. Mudofaa vazirligi tomonidan tashakkurnoma berilgan. Menga qanday imtiyozlar mavjud?
Baxtiyor Jo`raev, Toshkent viloyati Bo`ka tumani
Shohnur ERNAZAROV, Mudofaa vazirligi Axborot va ommaviy kommunikasiyalar departamenti yuridik bo`limi boshlig`i, adliya leytenanti:
— Fuqaroni qiziqtirgan masala O`zbekiston Respublikasi Prezidentining 2002 yil 30 maydagi “Yadro poligonlarida va boshqa radiasiya-yadro ob`ektlarida harbiy xizmatni o`tagan pensiya yoshidagi shaxslarni ijtimoiy qo`llab-quvvatlash to`g`risida”gi PF-3079-son Farmoni va 2002 yil 31 maydagi O`zbekiston Respublikasi Vazirlar Mahkamasining “Yadro poligonlarida va boshqa radiasiya-yadro ob`ektlarida harbiy xizmatni o`tagan pensiya yoshidagi shaxslarni ijtimoiy qo`llab-quvvatlashni ta`minlash chora-tadbirlari to`g`risida”gi 188-sonli qarori bilan tartibga solinadi. Yuqorida nomi keltirilgan hujjatlarda yadro poligonlarida va boshqa radiasiya-yadro ob`ektlarida harbiy xizmatni o`tagani uchun imtiyozlar nazarda tutilgan. Belgilagan imtiyozlar tegishli tasdiqnomaga ega bo`lgan shaxslarga, ular pensiya yoshiga etganda tatbiq etiladi.
Fuqaro Baxtiyor Jo`raev ham ayni shunday shaxslar ro`yxatida 46-raqam bilan qayd etilgan (2019 yil yanvar oyidagi holat bo`yicha).
Agar fuqaro pensiyaga chiqqan bo`lsa, mazkur toifa shaxslar qatorida quyidagi imtiyozlarga ega bo`ladi:
— Sanatoriy-kurort yo`llanmalari, protez-ortopediya buyumlari (tishni protez qilishdan tashqari) va eshitish apparatlari, shifokorning resepti bo`yicha dori-darmonlar bilan bepul ta`minlash;
— Mehnat qobiliyatini vaqtincha yo`qotganlik bo`yicha nafaqalarni ish stajidan qat`i nazar, to`liq ish haqi miqdorida to`lash;
— Yillik ta`tildan o`zlari uchun qulay vaqtda foydalanish, shuningdek, har yili ish haqi saqlangan holda kamida 12 ish kuni davomidagi qo`shimcha ta`til olish;
— Istiqomat joyida ma`muriy tuman doirasidagi qishloq joylarda jamoat foydalanadigan avtomobil transportida (taksi bundan mustasno), shuningdek, shahar atrofida qatnovchi temiryo`l transportida va shahar atrofi yo`nalishlaridagi avtobuslarda bepul yurish;
— I va II guruh nogironlariga – bazaviy hisoblash miqdorining 3 baravari miqdorida;
— III guruh nogironlariga – bazaviy hisoblash miqdorining 2 baravari miqdorida.
Shuningdek, Vazirlar Mahkamasining 2002 yil 28 fevraldagi 71-sonli qarorining 1-bandiga asosan yadro poligonlarida va boshqa radiasiya-yadro ob`ektlarida harbiy xizmatni o`tagan pensiya yoshidagi nogiron xodimlar vaqtinchalik mehnat qobiliyatini yo`qotganda oylik ish haqining to`liq miqdorida saqlanib qoladi.
Sadoqat ALLABERGANOVA, jurnalist