— Dehqon xo`jaligi asosida 35 sotix erimiz bor. Shundan 12 sotix lalmi er, 23 sotix obi er. Erni otamning nomidan ukamning nomiga o`tkazish uchun tuman fermerlar uyushmasiga borganimda, Vazirlar Mahkamasining qaroriga ko`ra, lalmi va obi erga 223 ming so`mdan to`lashim kerakligini aytishdi. To`lovni har yili to`lashim kerak ekan. Soliq ham to`lanadimi?
Mansur Rahmatov, Qashqadaryo viloyati Yakkabog` tumani
Zafar RAHIMJONOV, Davlat soliq qo`mitasi katta inspektori:
— Yangi tahrirda qabul qilingan Soliq kodeksining 418, 433-moddalariga muvofiq, egaligida va foydalanishida uy-joy, dala hovli imoratlari va er uchastkalari mavjud bo`lgan jismoniy shaxslar, shuningdek, yuridik shaxs tashkil etgan yoki etmagan holdagi dehqon xo`jaliklari jismoniy shaxslardan olinadigan mol-mulk va er soliqlarini to`lovchilar deb e`tirof etiladi.
Bunda,
► Mol-mulk solig`i mulkning kadastr qiymatiga nisbatan, mulk maydoni 200 kv.metrgacha bo`lganda, 0,2 foiz, 200 kv.metrdan oshganda, 0,25 foiz stavkada;
► Er solig`i stavkalari 1 kv.m. uchun mutlaq miqdorlarda belgilanadi.
Soliq stavkalarining aniq miqdori, er uchastkasining joylashgan hududi, shuningdek, lalmi yoki suvliligidan kelib chiqib, "Davlat byudjeti to`g`risida"gi Qonuni bilan belgilanadi.
Soliq kodeksining 408-moddasiga asosan, yuridik shaxs tashkil etgan holda va tashkil etmagan holda tuzilgan dehqon xo`jaliklarining a`zolari, shuningdek, maydoni to`rt sotixdan kam bo`lmagan dehqon xo`jaligida, tomorqa er uchastkasida band bo`lgan yoki ushbu maydonda qoramol, yoxud ellik boshdan kam bo`lmagan xonaki parranda parvarishlayotgan jismoniy shaxslar yiliga bazaviy hisoblash miqdorining kamida bir baravari miqdorida soliq to`laydi. Bunda, dehqon xo`jaligi rahbari soliqni majburiy tartibda to`laydi, boshqa a`zolari va ko`rsatilgan jismoniy shaxslar esa ixtiyoriy asosda to`laydi.
Belgilangan miqdordagi soliqning to`lanishi, dehqon xo`jaligi a`zosining va jismoniy shaxsning mehnat stajini hisoblab chiqarishda 1 yil deb hisobga olinadi.
Sadoqat ALLABERGANOVA
