Тошкентнинг тўртта тумани чегараларида ўзгариш бўлди

Халқ депутатлари Тошкент шаҳар кенгаши қарори билан пойтахтнинг Сергели, Бектемир, Мирзо Улуғбек ва Яшнобод туманлари ҳудудига Тошкент вилоятининг Зангиота, Қибрай, Юқори Чирчиқ ва Ўртачирчиқ туманларидан 7,8 минг гектардан кўпроқ ер майдонлари қўшиб берилди. Шу билан бирга, Сергели ва Бектемир туманларидан 171,3 гектар ер майдони Тошкент вилоятига ўтказилди.

Ҳужжатга кўра:

• Сергели тумани таркибига Зангиота туманидан 1827,1 гектар;
• Бектемир тумани таркибига Юқори Чирчиқ туманидан 490 гектар ва Ўрта Чирчиқ туманидан 1134,2 гектар;
• Мирзо Улуғбек тумани таркибига Қибрай туманидан 2294,6 гектар;
• Яшнобод тумани таркибига Қибрай туманидан 2107,4 гектар ер майдони қўшилди.

Бундан ташқари:

• Сергели туманидан 33,8 гектар ер майдони Зангиота тумани;
• Бектемир туманидан 137,5 гектар ер майдони Юқори Чирчиқ тумани таркибига ўтказилди.