"Афғонистондаги вазиятни ҳал этиш ва у ерда тинч ҳаётни тиклаш муҳим". Шавкат Мирзиёев Остонадаги саммитда нутқ сўзлади

Ўзбекистон Президенти Шавкат Мирзиёев Остона шаҳрида бўлиб ўтаётган Осиёда ҳамкорлик ва ишонч чоралари бўйича кенгаш VI саммитида нутқ сўзлади. 

Ўзбекистон раҳбари Афғонистондаги вазиятни ҳал этиш ва у ерда тинч ҳаётни тиклаш муҳимлигига эътибор қаратди. 

"Бу мамлакат халқаро террористик марказга айланмаслиги учун зарур", - деди Мирзиёев. 

Қайд этилишича, Афғонистон муваққат ҳукумати билан ўзаро ҳамкорлик бўйича умумий, келишилган ёндашувларни ишлаб чиқиш зарур. 

Ўзбекистон раҳбари Афғонистон ҳукумати мажбуриятларини босқичма-босқич бажариш алгоритмини тайёрлаш ва келишиш учун юқори даражадаги халқаро музокаралар гуруҳини тузиш ташаббуси билан Осиё давлатларининг БМТ Бош Ассамблеясига қўшма мурожаати имкониятини кўриб чиқишни таклиф қилди. 

“Биз радикал ғояларнинг кенг тарқалишига тобора кўпроқ дуч келяпмиз. Тарғибот ва мафкуравий таъсирнинг янги усулларидан фойдаланиб, бузғунчи кучлар ёшларни экстремистик ташкилотларга фаол жалб қилмоқда. Бу борада ёшларимизни радикализмдан асраш, уларнинг куч-ғайратини конструктив йўлга йўналтириш мақсадида тизимли ҳамкорликни йўлга қўйишимиз зарур", - деди Президент.

Ўзбекистон раҳбари, шунингдек, ҳамкор давлатларнинг Термиз шаҳрида Афғонистонга инсонпарварлик ёрдами жамғармасини ташкил этиш бўйича Ўзбекистон ташаббусини амалга оширишдаги қўллаб-қувватлови ва иштирокига умид билдирди.