“Ўзбекистон темир йўллари” “Қамчиқ” довони орқали ўтадиган йўл қурилишига $280 млн. кредит олди

Ўзбекистон тикланиш ва тараққиёт жамғармаси “Ўзбекистон темир йўллари” Давлат акциядорлик темирйўл компаниясига 280 млн. АҚШ доллари ҳажмида кредит ажратди.

Кредит “Қамчиқ” довони орқали ўтадиган “Ангрен-Поп” темир йўли қурилишига сарфланади, дея [url=http://uzdaily.uz/articles-id-19317.htm]хабар беради Uzdaily нашри.

Компания вакилининг маълумотларига кўра, кредит маблағлари лойиҳа доирасида амалга ошириладиган тоғ-қурилиш ишларини амалга ошириш учун зарур техника ва ускуна ҳарид қилишга йўналтирилади.

Узунлиги 129 км бўлган “Ангрен-Поп” янги электрлаштирилган темир йўл линиясининг қурилиш ишлари 2013 йилнинг июлида бошланган.

Йўл “Қамчиқ” довони орқали ўтиб, Фарғона водийсини Ўзбекистоннинг бошқа қисмлари билан боғлайди.

Дастлабки қиймати 1,769 млрд. АҚШ доллар бўлган лойиҳани молиялаштириш халқаро молия институтлари кредити ($1 млрд.) ҳамда Ўзбекистоннинг ўз маблағлари ҳисобига амалга оширилади. Қурилиши муддати – беш йил.

2013 йилнинг сентябрида China Railway Tunnel Group Хитой компанияси ва “Ўзбекистон темир йўллари” “Қамчиқ” довони орқали ўтадиган туннел қурилиши бўйича шартнома имзолади.

2014 йилда темирйўл компанияси лойиҳа доирасида $293,72 млн. маблағ ўзлаштиришни режалаштирган.