Uy qamog`i shaklidagi ehtiyot chorasi qanday hollarda qo`llaniladi? Tibbiy muassasa ham uy qamog`ida saqlash joyi hisoblanadimi?
N.Xoldorova, Samarqand
N.XALILOVA,O`zbekiston Respublikasi Oliy Majlisi Qonunchilik palatasi deputati:
— 2014 yilning 4 sentyabrida qabul qilingan “O`zbekiston Respublikasining ayrim qonun hujjatlariga o`zgartish va qo`shimchalar kiritish to`g`risida”gi O`zbekiston Respublikasining Qonuniga muvofiq, Jinoyat-prosessual kodeksiga uy qamog`i tarzidagi ehtiyot chorasi kiritildi.
Jinoyat Prosessual Kodeksiga kiritilgan yangi 242-1-moddaga asosan, uy qamog`i gumon qilinuvchi, ayblanuvchi yoki sudlanuvchiga nisbatan qamoqqa olish tarzida ehtiyot chorasini tanlash uchun asoslar mavjud bo`lganida uning yoshi, sog`lig`i, oilaviy ahvoli va boshqa holatlarni inobatga olgan holda qamoqqa olish nomuvofiq, deb topilgan taqdirda qo`llanilishi belgilab qo`yilgan. Gumon qilinuvchi, ayblanuvchi, sudlanuvchining surishtiruv, dastlabki tergov va suddan bo`yin tovlashining oldini olish maqsadida uy qamog`i qo`llaniladi.
Uy qamog`i ko`rsatilgan shaxsning jamiyatdan to`liq yoxud qisman ajratib qo`yilib, o`zi mulkdor, ijaraga oluvchi sifatida yoki boshqa qonuniy asoslarda yashab turgan turar joyda taqiqlar (cheklovlar) yuklatilgan, shuningdek uning ustidan nazorat amalga oshirilgan bo`lishi mumkin. Sog`liq holatini hisobga olgan holda tibbiy muassasa uy qamog`ida saqlash joyi etib belgilanishi mumkin.