6 oktyabr kuni Toshkent viloyatida Senat a`zolari, Hisob palatasi ekspertlari, Toshkent viloyati hokimligi mutasaddilari, mahalliy Kengashlar deputatlari, Senat huzuridagi Yoshlar parlamenti a`zolari, vazirlik va idoralar mas`ullari, hudud faollari hamda ommaviy axborot vositalari vakillari ishtirokida Oliy Majlis Senati Kengashining sayyor majlisi bo`lib o`tdi.
Ko`rilgan masalalar
O`zbekiston Respublikasi Oliy Majlisi Senati Raisi Tanzila Narbaeva olib borgan majlisda Senatning Hisob palatasi bilan birgalikda Toshkent viloyatida o`tkazilgan o`rganishi yakunlari ko`rib chiqildi. Xususan:
davlatimiz rahbarining hududga tashrifi mobaynida berilgan topshiriqlari ijrosi;
investisiya dasturlari doirasidagi loyihalar holati;
yangi ish o`rinlarini tashkil etish bo`yicha davlat buyurtmasi ijrosi;
mahalliy byudjetlarga qo`shimcha manbalarni jalb qilish va ulardan foydalanish samaradorligi tahlil qilindi.
Kamchiliklar esa talaygina
Asosan kamchiliklarga urg`u berilgan majlisda viloyatni o`rganishda aniqlangan quyidagi kamchiliklar sanab o`tildi:
O`zbekiston Respublikasi Prezidenti tomonidan qabul qilingan 655 ta normativ-huquqiy hujjatdagi 4 155 ta topshiriqdan 41 tasi o`z vaqtida va to`liq bajarilmagan.
Davlatimiz rahbarining tashriflari doirasida amalga oshirilishi belgilangan 30 ta investisiya kelishuvi ijrosi o`rganilganda, qiymati 622,4 mln. dollarlik 14 ta kelishuv ijrosi to`xtab qolgan.
339,3 mln. dollarlik 7 ta kelishuv ijrosi muddatidan kechikkan.
450 mln. dollarlik 5 ta loyiha esa umuman boshlanmagan ham.
investisiya dasturlari doirasida amalga oshirilishi lozim bo`lgan 909 ta loyihadan 233 tasining ijrosi ta`minlanmagan.
Ishlab chiqarishni mahalliylashtirish bo`yicha hisobotlarda o`rtacha mahalliylashtirish darajasi 2019 yilda 67,7 foiz, 2020 yilning birinchi yarim yilligida 56 foiz ko`rsatilgan bo`lsa-da, o`rganish natijasida ushbu ko`rsatkich mos ravishda 48,6 va 51 foizni tashkil etgan.
Hisobotlarda qo`shib yozish hisobiga oshirib ko`rsatish holatlariga yo`l qo`yilishi oqibatida mahalliylashtirish dasturi doirasida ishlab chiqarilgan mahsulotlarga o`xshash mahsulotlar import qilingan.
Viloyat miqyosida davlat buyurtmasidagi 7 ta yo`nalish bo`yicha belgilangan ko`rsatkich (30 401 ta ish o`rni) 32 847 taga yoki 108 foizga bajarilgan bo`lsa-da, 2 ta yo`nalishda 5 439 ta ish o`rni yaratilishi ta`minlanmagan.
tanlov asosida 2019 yilda haqiqatda yaratilmagan ish o`rinlari hududlar va yo`nalishlar kesimida o`rganilganda, ularning soni hisobotlarda ko`rsatilganga nisbatan 797 taga ko`pni tashkil qilgan.
Majlisda shu va boshqa kamchiliklarning sabablari tahlil qilinib, ularni bartaraf etish bo`yicha chora-tadbirlar belgilandi. Jumladan, Oliy Majlis Senati va Hisob palatasi tomonidan Toshkent viloyatida o`tkazilgan o`rganishda aniqlangan kamchiliklarni bartaraf etish va kelgusida ularga yo`l qo`ymaslik yuzasidan ishlab chiqilgan chora-tadbirlar dasturi tasdiqlandi. Unda, jumladan, amalga oshirish muddatidan kechikayotgan 10,9 trln. so`mlik 126 ta hamda amalga oshmay qolayotgan 20,7 trln. so`mlik 107 ta loyihaning ishga tushirilishini o`rganish uchun xatlov o`tkazish reja grafigini ishlab chiqish, shuningdek, istiqbolsiz loyihalarni o`rindosh loyihalar bilan almashtirish va ularni belgilangan muddatlarda ijro etilishini ta`minlash kabi choralar belgilandi. Shu yilning dekabr oyida qayta topshiriligan masalalar yuzasidan hisobot majlisi o`tkazilishiga kelishib olindi.
Sayyor majlis tafsilotlariga bag`ishlangan maqolararimizni kuzatishda davom eting.
