14-noyabr ”Xalqaro qandli diabetga qarshi kurash kuni” sifatida belgilangan. Shu munosabat bilan har yili respublikamizda noyabr oyida "Salomatlik oyligi" va uning doirasida xastalikning oldini olishga qaratilgan targ‘ibot tadbirlari o‘tkaziladi.
Bugun Toshkent shahridagi 51-Oilaviy poliklinikada ham ana shu mavzuga bag‘ishlangan tadbir tashkil etildi. Unda yaqin atrofdagi ushbu poliklinika xizmat ko‘rsatadigan mahallalardan kelgan 40 yoshdan katta bo‘lgan fuqarolar qatnashdi.
Shu kuni aholi o‘rtasida "Sog‘lom turmush tarzini shakllantirish" maqsadida "Dibetiklar maktabi" aʼzolari tomonidan “master-klass” o‘tkazildi.
Maʼlumki, sog‘lom turmush tarziga amal qilish yordamida barcha kasalliklar kabi diabet xastaligining ham oldini olish mumkin.
"Sog‘lom turmush tarzi" tushunchasi keng maʼnoga ega bo‘lib, u avvalo jismoniy faollikni talab etadi. Shu bilan birga, zararli odatlardan uzoq bo‘lish, yaʼni giyohvandlik moddalari, tamaki, spirtli ichimliklarni isteʼmol qilmaslik, salbiy ko‘nikmalarga qarshi kurashish va ratsional ovqatlanish kabi tadbirlarni o‘z ichiga oladi.
Hususan, bo‘lib o‘tgan “master-klass” o‘quv-targ‘ibot tadbirida poliklinika bosh shifokori Go‘zal Qodirova sog‘lom turmush asoslaridan jismoniy faollik va to‘g‘ri ovqatlanish masalalariga keng to‘xtalib o‘tdi.
–Har qanday kasallik immunitet tanqisligi oqibatida yuzaga keladi, agar tana kerakli vitamin va mineral moddalar bilan vaqtida taʼminlansa, organizmdagi barcha tirik hujayralarning to‘yimlilik miqdori meʼyorida bo‘ladi. Bu degani kasalliklarning oldi olinadi.
Gohida insonlarda turmush tashvishlari deb, o‘z vaqtida ovqatlanish tartibi buziladi yoki to‘laqonli taomlanmaslik oqibatida tanada foydali moddalar kamayib ketadi. Buning oldini olish uchun ratsionga eʼtiborli bo‘lish kerak, – deydi Go‘zal Qodirova.
Tadbir davomida ishtirokchilarning savollariga javob berildi hamda diabetning oldini olish bo‘yicha tavsiyalar yozilgan bukletlar ulashildi. Immunitetni ko‘tarishga foydali tabiiy vositalar, shipovnik, rux va boshqa darmondorilar tarqatildi.
Maʼlumot uchun: Toshkent shahridagi 51-Oilaviy poliklinika Shahriston, Anorzor, G‘ayratiy, Usta Shirin, Iftixor, Yangi Ariq va Jomiy mahallalari aholisiga xizmat ko‘rsatadi.
Shuningdek, poliklinikada umumiy aholi soni 34559 nafar, 65 yoshdan katta aholi soni esa 3456 nafarni tashkil etadi. Ayni damda “Salomatlik” oyligida 65 yoshdan katta aholi tibbiy ko‘rikdan o‘tkazilmoqda. Aniqlangan kasaliklar bo‘yicha tavsiyalar berib, bemorlar sog‘lomlashtirilmoqda.
