Ijtimoiy tarmoqlarda "Yana bir YPX xodimi kapot ustida sudrab ketildi" sarlavhasi ostida video tarqaldi. Unda o`zboshimcha haydovchining to`xtash ishorasiga amal qilmay, avtomashina "kapot"i ustiga YPX xodimini ortgan holatda harakatlangani tasvirlangan.
Yuzaga kelgan ushbu vaziyat yuzasidan YHXBB ham ma`lumot berdi.
Qayd etilishicha, joriy yilning 13 sentyabr kuni Surxondaryo viloyati, Qumqo`rg`on tumani, "Surxon sohili" MFY hududida YPX xodimi yo`lning qatnov qismiga to`xtagan "Lacetti" rusumli avtomobil haydovchisining yoniga borib, o`zini tanishtirib, to`xtash qoidasini buzganligini aytib tegishli hujjatlarini taqdim qilishini so`ragan. Haydovchi xodimning talabini bajarmasdan, avtomobilini inspektorning ustiga boshqargan. Xodim qochishga ulgurmasdan avtomobilning kapot qismida osilib qolgan. Avtomobil taxminan 3,4 kilometr masofagacha harakatlangandan so`ng, xodim erga qulab tushgan.
Shundan keyin YPX xodimi tan jarohati bilan tuman tibbiyot birlashmasiga murojaat qiladi.
Hozirda mazkur holat yuzasidan tuman prokuraturasi tomonidan tegishli tartibda jinoyat ishi qo`zg`atilib, dastlabki tergov harakatlari olib borilayotgani ta`kidlanmoqda.
