Sevimli

“Buyuk Ipak yo`li” muzeyini barpo etishda inklyuzivlik muhitiga alohida e`tibor qaratiladi

Madaniyat 19.01.2022, 17:13
“Buyuk Ipak yo`li” muzeyini barpo etishda inklyuzivlik muhitiga alohida e`tibor qaratiladi

Samarqand shahridagi “Buyuk Ipak yo`li” muzeyining dastlabki dizayn konsepsiyasi taqdim etildi. Muzey Samarqand shahri markazida – Universitet bulvari va Bobur Mirzo ko`chasi o`rtasida joylashib, uning qurilishida inklyuzivlik muhitiga alohida e`tibor qaratiladi.

Bu haqida poytaxtda Bosh vazir o`rinbosari, Turizm va sport vaziri Aziz Abduhakimov va Madaniyat va san`atni rivojlantirish jamg`armasi ijrochi direktori Gayane Umerova ishtirokida bo`lib o`tgan taqdimot tadbiri doirasida ma`lum qilindi.

“Ta`kidlash lozimki, davlatimiz rahbari tomonidan O`zbekistonning madaniyat va san`at sohalarini qayta isloh qilish va rivojlantirishga yo`naltirilgan qator normativ-huquqiy hujjatlarda o`z aksini topgan fundamental qarorlar qabul qilinmoqda. Ushbu qarorlarni amalga oshirishga doir hujjatlardan biri O`zbekiston Respublikasi Prezidentining “2021-2022 yillarda Samarqand shahri infratuzilmasini yaxshilash va turizmni rivojlantirish uchun sharoitlar yaratish bo`yicha kompleks chora-tadbirlar to`g`risida”gi (2021 yil 23 fevraldagi 4999-sonli) qarori hisoblanadi”, - dedi Aziz Abduhakimov.

Qarorga ko`ra, Samarqand shahrida “Buyuk Ipak yo`li” muzeyini bunyod etish Madaniyat va san`atni rivojlantirish jamg`armasiga topshirilgan. Loyiha Samarqand viloyati hokimligi bilan hamkorlikda amalga oshirilmoqda, uning dizayn konsepsiyasini yaratishda esa Jamg`arma Germaniyaning “Atelier Brookner GmbH” byurosi bilan hamkorlik qilmoqda.

Dastlabki dizayn konsepsiyasiga ko`ra, qaytadan qurilishi rejalashtirilayotgan muzeyning tashqi ko`rinishi silliq ipak tasma shaklida bo`lib, Ipak yo`lini eslatadi va butun bino bo`ylab o`tgan bo`lib, markaziy maydonni pandus ko`rinishida kesib o`tadi. Binoning birinchi qavati markazida Samarqand shahri tasviri namoyon bo`ladi, tom qismida esa - barcha qavatlardan ko`rinib turuvchi landshaft elementlari. Shuningdek, binoning barmoqlarni eslatuvchi o`ziga xos maydoni ko`rgazma ekspozisiyalarini yaratish uchun qulay sharoit bilan ta`minlaydi.

Muzey ko`rgazma zallarining ichki bezaklariga hamohang bo`lgan yuqori qavatdagi ekspozisiya zonasi uch “qanot” orqali o`tadi va markaziy ochiq Atriumni qamrab oladi. Har bir “qanot”ning oxirida uch tematik zona joylashgan.

Konsepsiyaga ko`ra, bino pastki qavatining qo`shimcha maydonlari yuqori qavatdagi ko`rgazmaga olib boruvchi markaziy panduslar bilan bog`lanadi va galereyalar uch tematik zonaga ajratiladi: ilm-fan va madaniyat, yo`nalish va landshaft, eksport va import. Ushbu zonalar o`rtasida Samarqand shahri markazi - madaniyatlararo kesishma aks etadi va bu erdagi katta doira shaklidagi vitrina yirik kolleksiyalarni namoyish qilish imkonini beradi.

Jamg`arma muzey dizayni konsepsiyasini ishlab chiqishda shuningdek inklyuziv muhitni ta`minlashga alohida e`tibor qaratdi. Xususan, mehmonlarning qulayligi uchun muzeyda ko`rsatkichlar o`rnatilgan, raqamli va me`morchilik dizayniga o`ziga xos ravishda yondashilgan.

Shuningdek, muzey maydonidan yana-da samarali foydalanish maqsadida uning tom qismida dam olish uchun, shu jumladan mehmonlarning o`tirishi joylarni ko`paytirish, bolalar maydoni va bog` qismini kengaytirish ko`zda tutilgan. Eng asosiysi, qurilish maydoni atrofidagi daraxtlarga ziyon etkazmaslik maqsad qilingan.

Mazkur loyiha YuNESKO butunjahon merosi qo`mitasiga muvofiqlashtirish uchun kiritiladi, zero obekt qurilishi rejalashtirilgan hudud Samarqandning YuNESKO ro`yxatidan o`rin olgan tarixiy qismida joylashgan.

Шарҳлар