Koronavirus, ayniqsa uning yangi shtammi bolalarda qanday belgilar bilan namoyon bo`lmoqda? Farzandlarimizni bu yuqumli kasallikdan himoya qilish uchun nimalarga e`tibor berishimiz kerak? Umuman, vaziyat chindan ham xavotirlimi?
Bu savollarga Zangiota 1-son yuqumli kasalliklar shifoxonasi direktori o`rinbosari Hilola Alimovadan javob berdi.
— Hozir bolalarda kechayotgan koronavirus xastaligini gripp yoki oddiy shamollashdan farqlash qiyin. U asosan, isitma, ishtaha yo`qolishi, ko`ngil aynishi, quruq yo`tal, nafas qisishi, diareya, asabiylashish kabi belgilar bilan namoyon bo`ladi.
— Ota-onalar farzandi COVID-19 virusini yuqtirganiga shubha qilsa, qanday yo`l tutishlari kerak?
— Kasallik belgilari kuzatilsa, vrach tavsiyasiga ko`ra, PZR testi topshirilishi kerak.
Buning uchun Sanitariya-epidemiologik osoyishtalik va jamoat salomatligi xizmatining hududlardagi bo`linmalariga, Toshkent shahrida esa har bir tumandagi maxsus COVID poliklinikalariga ham kunu tun murojaat qilishingiz mumkin.
— Bugun ko`pchilik ota-onalarni “bolamni koronavirusdan qanday himoya qilishim mumkin?” degan savol o`ylantirayotgani shubhasiz...
— Buning uchun, avvalo, ular o`zlarini virusdan himoya qilishlari lozim bo`ladi.
Shuningdek, ota-onalar quyidagi tavsiyalarni beramiz:
- Farzandingizning qo`llarini tez-tez yuving va ularga ko`p bosqichli qo`l yuvish texnikasini o`rgating.
- Bolaga jamoat joylaridan qaytganidan keyin qo`llarini yuvishdan oldin og`iz, burun, ko`zlarga tegmaslik kerakligini tushuntiring.
- Tibbiy niqob rejimiga rioya qiling.
- 5 yoshdan katta bo`lgan bolalarni koronavirusga qarshi emlashni unutmang!
- Bolaning immunitetini mustahkamlash ham muhim.
- Balanslangan ovqatlanish, jismoniy faollik (lekin me`yorida), aqliy faollik va hissiy barqarorlik, muntazam tibbiy nazorat infeksiyaning oldini olishga yordam beradi.
— Qanday belgilar kuzatilsa, tez tibbiy yordam xizmatiga murojaat qilish kerak?
— Tana harorati yuqori ko`tarilishi, nafas olish qiyinlashishi, tez yoki sayoz nafas olish (chaqaloqlarda: ingrab nafas olish, emishdan bosh tortish), lablar yoki butun yuzning siyanozi (terining ko`kimtir tus olishi) kabi holatlar kuzatilsa, zudlik bilan oilaviy poliklinikaga yoki tez tibbiy yordam xizmatiga murojaat qilishingiz tavsiya qilinadi.
