Shu kunlarda internet tarmoqlarda “Fuqarolar boshiga to`qmoq — Navoiyda fuqarolar hokimlikning soxta qaroridan aziyat chekmoqda” sarlavhali xabar muhokamalarga sabab bo`lmoqda.
Xabarda 2007 yilda Navoiy viloyati, Karmana tumanining Navoiy shahriga tutash Narpay QFY hududidan fuqarolarga uy-joy qurish uchun er ajratish yuzasidan chiqarilgan tuman hokimining (o`sha paytdagi hokimi Ch.Qanoatov) 8/37-sonli qaror soxta ekanligi, buning ortidan fuqarolar sarson bo`layotgan qayd etilgan.
Shuningdek, holat yuzasidan 2020 yil jinoyat ishi qo`zg`atilib, fuqaro G`affor Razzoqov (2007 yilda Karmana tuman er resurslari va davlat kadastr bo`limi boshlig`i) tuman hokimining qarorini soxtalashtirganligi hamda u 2009 yilda vafot etgani tufayli jinoiy ish harakatdan tugatilganligi ma`lum qilingan.
Shu bois Senatning Sud-huquq masalalari va korrupsiyaga qarshi kurashish qo`mitasi O`zbekiston Respublikasi Bosh prokuraturasidan mazkur holatni o`rganib, natijasi yuzasidan rasmiy munosabat berishini so`radi.
