"UzAuto Motors" rahbariyati Andijon viloyatidagi tizim korxonalariga tashrif buyurdi. Bu haqda Kompaniya matbuot xizmati xabar bermoqda.
Ma`lum qilinishicha, joriy yilning mart oyi boshidan davom etayotgan tashrif doirasida, “O`zavtosanoat” AJ boshqaruv raisi Shavkat Umurzoqov o`z o`rinbosarlari, boshqarma boshliqlari va Komplaens xizmati vakillari ishtirokida Asaka shahridagi "UzAuto Motors" zavodi va sanoat korxonalarining biznes-rejalari ijrosini kompleks o`rganmoqda.
Sanoat rahbari tashrifi davomida 30 ga yaqin mahalliylashtirish korxonalari, jumladan, “Uz Koram Ko” MChJ, “Uz-Tong Heung Co” AJ, “O‘z Erae Climate Control” MChJ va boshqa korxonalarda bo`ldi. Komplaens xizmati bilan hamkorlikda Shavkat Umurzoqov sohadagi har bir korxonada auditorlik tekshiruvini o`tkazmoqda, xususan, logistika, ta`minot zanjiri (Supply Chain), mahsulot sifatini yaxshilash va biznes-rejalar bajarilishini o`rganilmoqda.
15 mart kuni "UzAuto Motors"da Shavkat Umurzoqov raisligida bo`lib o`tgan kengaytirilgan ishchi yig`ilishidagi asosiy mavzu 2022 yil uchun byudjet va biznes-reja masalalari bo`ldi. “O`zavtosanoat” boshqaruv raisi o`zining qisqa kirish so`zida bu yilgi biznes-rejada nafaqat belgilangan maqsadlarga erishish, balki 2021 yilda nimalar o`tkazib yuborilganiga ham jiddiy e`tibor qaratish zarurligini ta`kidladi.
Bu yilda butun avtomobilsozlik sanoati va "UzAuto Motors" oldiga aniq maqsad qo`yildi – avtomobil ishlab chiqarishda maksimal yuqori ko`rsatkichlarga erishish. Shu bilan birga, yig`ilishda ta`kidlanganidek, avtomobil ishlab chiqaruvchilarning 2022 yilgi biznes rejasida doimiy o`zgaruvchan siyosiy-iqtisodiy muhit shuningdek, davom etayotgan logistika va yarimo``tkazgichlar inqirozi kabi qiyin sharoitlarda sifatni yaxshilash va ishlab chiqarishni optimallashtirish bilan mahsulot qatorini kengaytirish uchun juda katta maqsadlar qo`yilgan.
