O`tgan hafta Prezident ishtirokidagi biznesni qo`llab-quvvatlash bo`yicha qo`shimcha sharoitlar yaratishga bag`ishlangan yig`ilishda davlat rahbari soliq tizimiga ham alohida to`xtalib o`tgan edi.
“Oxirgi soliq ma`murchiligi bo`yicha o`zgarishlar tadbirkorlar o`rtasida ko`plab tushunmovchilik va savollarni keltirib chiqardi. Shuning uchun, topshirig`imga ko`ra, Moliya vazirligi va Soliq qo`mitasi huzurida yirik tadbirkorlar, olimlar va faol jamoatchilar ishtirokida Jamoatchilik kengashi tuzildi”, degan edi Prezident.
Moliya vazirligi va DSQga har hafta tadbirkorlar bilan uchrashish va ijtimoiy tarmoqlar orqali tushgan savollar va tizimli masalalarni muhokama qilish, ularning echimi bo`yicha takliflar kiritib borish topshirildi.
Ayni topshiriq ijrosi o`laroq, Davlat soliq qo`mitasi va Moliya vazirligi rahbariyati norasmiy formatda soha mutaxassislari, soliq maslahatchilari va ishbilarmon doiralar vakillari bilan uchrashuv o`tkazdi. Bu haqda Davlat soliq qo`mitasi matbuot xizmati xabar bermoqda.
Kun tartibida – turli soha va yo`nalishlar vakillari ishtirokida soliq uzilishining yangi informasion ko`rsatkichi , budjet daromadlari va soliq ma`muriyatchiligi sifatini oshirishdagi samaradorligi masalalari atroflicha muhokama qilindi.
Eslatib o`tamiz, qo`shilgan qiymat solig`i to`lovchilarini ro`yxatga olishda joriy qilingan tahlika-tahlilga asoslangan yondashuv tadbirkorlik sub`ektlari faoliyatini og`irlashtiruvchi omil hisoblanmaydi. Soliq uzilishi koeffisienti faqat informativ xarakterga ega bo`lib, kontragentlarni tanlashda lozim darajada ehtiyotkor bo`lishga xizmat qiladi va soliq to`lovchining QQS guvohnomasi holatiga ta`sir etmaydi. Bundan tashqari, tizim xavflarni operativ aniqlash va tuzatishga zamin yaratadi va ishbilarmonlik faolligini susaytirmaslik imkonini beradi.
So`z olganlar soliq uzilishining salohiyati va afzalliklarini tasdiqlab, uni “ajoyib monitoring vositasi”, “a`lo darajadagi indikator”, “barcha biznes ishtirokchilari uchun zarur bo`lgan ma`lumot manbai” ekanligini qayd etdi.
QQS zanjiridagi soliq uzilishi koeffisientini belgilovchi hisoblangan va amalda to`langan QQS summalarini solishtirishning arifmetik algoritmi ham ijobiy baholandi. Joriy etilgan tizim qisqa muddatda o`z samaradorligini ko`rsatayotgani ta`kidlandi.
Tax gap korxonalar va tashkilotlarning o`zaro shubhali hamkorligiga oid xavflarni keltirib chiqarmaydi. Biznes hamjamiyati vakillari hamkor va kontragentlarning xatti-harakatlariga bevosita ta`sir qilib, shaffof va qonuniy biznesni rag`batlantirishini qayd etdi.
Yig`ilganlar QQS guvohnomasining amal qilishini to`xtatib turish, kontragent uchun javobgarlik kabi “og`riqli” nuqtalar haqida ham mulohaza yuritdi. Tadbirkorlarni qo`llab-quvvatlash borasidagi ayrim jihatlarni qayta ko`rib chiqish taklif etildi.
Tizimni strategik takomillashtirish uchun sohaning o`ziga xos xususiyatlari, iqtisodiy imkoniyatlari va hududlar ehtiyojlarini hisobga olgan holda soliq yig`iluvchanlik hajmini oshirish bilan birga, mahalliy ishbilarmonlik muhitini rivojlantirish va o`zaro ishonchni oshirish imkonini beruvchi takliflar ishlab chiqildi.
Norasmiy suhbat yakunida keyingi uchrashuvlar uchun dolzarb mavzular va savollar belgilab olindi.
Davlat soliq qo`mitasining professional jamoatchilik vakillari bilan konstruktiv muloqoti davom etadi.
