Давлат солиқ қўмитаси ва Молия вазирлиги раҳбарияти норасмий форматда соҳа мутахассислари, солиқ маслаҳатчилари ва ишбилармон доиралар вакиллари билан учрашув ўтказди. Бу ҳақда Давлат солиқ қўмитаси матбуот хизмати хабар бермоқда.
Кун тартибида – турли соҳа ва йўналишлар вакиллари иштирокида солиқ узилишининг янги информацион кўрсаткичи , буджет даромадлари ва солиқ маъмуриятчилиги сифатини оширишдаги самарадорлиги масалалари атрофлича муҳокама қилинди.
Эслатиб ўтамиз, қўшилган қиймат солиғи тўловчиларини рўйхатга олишда жорий қилинган таҳлика-таҳлилга асосланган ёндашув тадбиркорлик субъектлари фаолиятини оғирлаштирувчи омил ҳисобланмайди. Солиқ узилиши коеффициенти фақат информатив характерга эга бўлиб, контрагентларни танлашда лозим даражада эҳтиёткор бўлишга хизмат қилади ва солиқ тўловчининг ҚҚС гувоҳномаси ҳолатига таъсир этмайди. Бундан ташқари, тизим хавфларни оператив аниқлаш ва тузатишга замин яратади ва ишбилармонлик фаоллигини сусайтирмаслик имконини беради.
Сўз олганлар солиқ узилишининг салоҳияти ва афзалликларини тасдиқлаб, уни “ажойиб мониторинг воситаси”, “аъло даражадаги индикатор”, “барча бизнес иштирокчилари учун зарур бўлган маълумот манбаи” эканлигини қайд этди.
ҚҚС занжиридаги солиқ узилиши коеффициентини белгиловчи ҳисобланган ва амалда тўланган ҚҚС суммаларини солиштиришнинг арифметик алгоритми ҳам ижобий баҳоланди. Жорий этилган тизим қисқа муддатда ўз самарадорлигини кўрсатаётгани таъкидланди.
Тах гап корхоналар ва ташкилотларнинг ўзаро шубҳали ҳамкорлигига оид хавфларни келтириб чиқармайди. Бизнес ҳамжамияти вакиллари ҳамкор ва контрагентларнинг хатти-ҳаракатларига бевосита таъсир қилиб, шаффоф ва қонуний бизнесни рағбатлантиришини қайд этди.
Йиғилганлар ҚҚС гувоҳномасининг амал қилишини тўхтатиб туриш, контрагент учун жавобгарлик каби “оғриқли” нуқталар ҳақида ҳам мулоҳаза юритди. Тадбиркорларни қўллаб-қувватлаш борасидаги айрим жиҳатларни қайта кўриб чиқиш таклиф этилди.
Тизимни стратегик такомиллаштириш учун соҳанинг ўзига хос хусусиятлари, иқтисодий имкониятлари ва ҳудудлар эҳтиёжларини ҳисобга олган ҳолда солиқ йиғилувчанлик ҳажмини ошириш билан бирга, маҳаллий ишбилармонлик муҳитини ривожлантириш ва ўзаро ишончни ошириш имконини берувчи таклифлар ишлаб чиқилди.
Норасмий суҳбат якунида кейинги учрашувлар учун долзарб мавзулар ва саволлар белгилаб олинди.
Эслатиб ўтамиз, ўтган ҳафта Президент иштирокидаги бизнесни қўллаб-қувватлаш бўйича қўшимча шароитлар яратишга бағишланган йиғилишда давлат раҳбари солиқ тизимига ҳам алоҳида тўхталиб ўтган эди.
“Охирги солиқ маъмурчилиги бўйича ўзгаришлар тадбиркорлар ўртасида кўплаб тушунмовчилик ва саволларни келтириб чиқарди. Шунинг учун, топшириғимга кўра, Молия вазирлиги ва Солиқ қўмитаси ҳузурида йирик тадбиркорлар, олимлар ва фаол жамоатчилар иштирокида Жамоатчилик кенгаши тузилди”, деган эди Президент.
Молия вазирлиги ва ДСҚга ҳар ҳафта тадбиркорлар билан учрашиш ва ижтимоий тармоқлар орқали тушган саволлар ва тизимли масалаларни муҳокама қилиш, уларнинг ечими бўйича таклифлар киритиб бориш топширилди.
Қўмита матбуот хизматининг хабар қилишича, Давлат солиқ қўмитасининг профессионал жамоатчилик вакиллари билан бу каби конструктив мулоқоти давом этади.
