Birlashgan Arab Amirliklarining “Masdar” kompaniyasi tomonidan Navoiy viloyatining Tomdi tumanida quvvati 500 MVt bo`lgan shamol elektr stansiyasi qurilmoqda. Bu haqda Energetika vazirligi Matbuot xizmati xabar bermoqda.
Ma`lum qilinishicha, "Masdar" va Xitoyning "Goldvind" kompaniyalari o`rtasida Navoiy viloyatining Tomdi tumanida qurilayotgan shamol elektr stansiyasi uchun 111 ta turbinani etkazib berish bo`yicha shartnoma imzolangan.
Shunga ko`ra, Xitoyning Lanjou shahridan O`zbekistonda qurilayotgan shamol elektr stansiyasi uchun shamol generator va turbinalari maxsus transport vositalari orqali olib kelinmoqda.
Mazkur elektr stansiya joriy yil yakunida ishga tushiriladi va u Markaziy Osiyodagi eng yirik shamol elektr stansiyasi bo`lib hisoblanadi.
Stansiya to`liq ishga tushirilgach, yiliga 1 mlrd 800 mln kVt.soat elektr energiyasi ishlab chiqariladi. Buning natijasida yiliga 540 mln kub metr tabiiy gaz tejalishiga erishiladi va atmosferaga 720 ming tonna zararli gazlar chiqishining oldi olinadi.
Eslatib o`tamiz, ushbu yirik loyiha Prezidentimizning 2020 yil 22 dekabrdagi qarori asosida amalga oshirilmoqda.
