Boy bo`lishning 7 siri

Tez va osongina boyib ketishni kim ham istamaydi deysiz. Pulga baxtni sotib olish mumkin emasdir, lekin ro`zg`ori to`kis, farzandlari va yaqinlari hech bir narsaga muhtoj bo`lmay yashayotgan insonlar o`zini baxtsiz sanamasligi aniq. Shu sababdan badavlat bo`lishga yordam beradigan ayrim tavsiyalar bilan bo`lishmoqchimiz!

1. Omadga ishoning! Fikrlar moddiylashuvi bor gap, «Men baxtliman, hech kimdan kam joyim yo`q. hech bir narsaga muhtoj emasman» deb o`ylashni kanda qilmang. Negaki, bir kun kelib, ular, albatta, haqiqatga aylanadi.

2. Ehtiyojlaringizni qondirishdan ortib qolgan pulni biror bir foyda keltiradigan jabhaga yo`naltiring. Masalan, biror bir ko`chmas mulk sotib oling. Undan to`g`ri va unumli foydalanish natijasida qo`shimcha mablag` topishingiz, shubhasiz.

3. Barcha banklarda turli foizli omonat kassalari mavjud bo`lib, ulardan o`zingizga ma`qulini tanlab, oz miqdorda bo`lsa-da pul qo`ying. Oyma-oy pulingiz miqdorining ko`payib borishi sizni quvontiradi.

4. Iqtisod qilish ham bir san`at! Xarid qilishingiz kerakmi, qo`lingizda, albatta, faqatgina zarur mahsulotlar ro`yxati bo`lsin. Keraksiz, uyning bir burchagida chang bosib yotadigan buyumlarni sotib olishdan tiyiling. Unga sarflangan mablag`ni boshqa bir foydali tomonga yo`naltirish mumkin.

5. Ishingizni sidqidildan bajaring. Mehnatkash xodim hammaga kerak. Bu xizmat pillapoyalaridan ko`tarilish bilan birga oylik maoshingizning oshishiga xizmat qiladi. Ko`nglingizga yaqin bo`lmagan ishda faoliyat yuritib, katta maosh olsangiz ham, bu pullar sizni quvontira olmasligi mumkin.  

6. Tadbirkorlik bilan shug`ullanib ko`ring. To`g`ri, bu qiyin ish, lekin uni uddalay olasiz. Buning uchun biroz bilim va boshqarish qobiliyati zarur bo`ladi. Tajribasi bor va ishonchli insonlardan maslahat olish zarar qilmaydi.

7. Turli qing`ir va noqonuniy yo`llar bilan pul topishga qiziqa ko`rmang! Bunday ishlarning oxiri voy bo`ladi. Lotoreya o`yinlari ham har doim kutilgan natijani beravermaydi, shuni ham unutmang.