Farg‘onada universitet talabasi Jentra mashinasini olib qochganligi aniqlandi. Bu haqda Aziz Obidov ma’lum qildi.
Ma’lum bo‘lishicha, universitet talabasi darsdan tashqari Farg‘ona shahridagi "avtomoyka"da ishlab kelgan. U mashinasini yuvdirgani kelgan shaxsning Jentra’sini o‘g‘irlab ketib, mashina egasining texnik pasportini Qo‘qondagi oshxonaga garov sifatida bergan.
Shuningdek, yigit mashinadagi "antiradar"ni sotib yuborgan. U olib qochgan mashinani Marg‘ilondagi istirohat bog‘i yaqiniga tashlab ketgan. Qidiruv ishlari davomida mashina topilgan.
Ma’lumotlarga ko‘ra, yigit jinoiy ishlarini davom ettirib, tanishining 1 million 800 ming so‘mlik telefonini o‘g‘irlab sotib yuborgan.
Mazkur holatni Jinoyat ishlari bo‘yicha Farg‘ona sudi ko‘rib chiqib, yigit Jinoyat Kodeksining 168 moddasi (Firibgarlik), 169 modda (O‘g‘rilik) va 227 moddasi (Hujjatlar, shtamplar, muhrlar, blankalarni, avtomototransport vositalarining va ular tirkamalarining (yarim tirkamalarining) davlat raqam belgilarini egallash, nobud qilish, ularga shikast yetkazish yoki ularni yashirish) hamda 267 moddasi (Transport vositasini olib qochish) bilan 5 yilga qamaldi.
