Bugun, 13 avgust kuni mehribonlik uyi tarbiyalanuvchisi "samosud" qilingani aks etgan video ijtimoiy tarmoqlarga sizdirildi. Ushbu holat yuzasidan Toshkent viloyati IIBB Matbuot xizmati izoh berdi.
Videodagi holat joriy yilning 5 avgust kuni Toshkent viloyati Bo‘stonliq tumani Qizil-suv mahallasida joylashgan Mehribonlik uyi oromgohida (Chilonzor tumanidagi 22-sonli mehribonlik uyidan kelgan) tarbiyalanuvchilar o‘rtasida sodir bo‘lgan.
Oromgohga dam olishga kelgan 3 nafar (2008 yilda tug‘ilgan S.X., D.I va V.L) tarbiyalanuvchilar o‘zaro janjallashgan. Ushbu holatni boshqa bir tarbiyalanuvchi videotasvirga olib, ijtimoiy tarmoqlarga tarqatgan.
Hozirda holat yuzasidan hududiy ichki ishlar boshqarmasi xodimlari tomonidan tergovga qadar tekshiruv harakatlari olib borilmoqda.
Eslatib o‘tamiz, Mexribonlik uyining sobiq tarbiyalanuvchilaridan biri, hozirda huququshunos, bola huquqlari bo‘yicha faol bo‘lib ishlaydigan Shermuhammad Dehqonov darakchi.uz bilan aloqaga chiqib, "detdom"da bir necha yil avval ham shu kabi voqealarga guvoh bo‘lganini so‘zlab berdi.
