BMT Bosh assambleyasi Isroildan Xalqaro sud qarorini bajarishi va bosib olingan Falastin hududini bir yil ichida tark etishni talab qiluvchi rezolyutsiya loyihasini qabul qildi. Bu haqda "TASS" xabar berdi.
Rezolyutsiyani 124 davlat, jumladan O‘zbekiston, Qozog‘iston, Rossiya, Belgiya, Braziliya, Qatar, Xitoy va Fransiya qo‘llab-quvvatladi. Shuningdek 14 davlat (Isroil, AQSH, Vengriya va boshqalar) qarshi chiqdi, yana 43 davlat ovoz berishda betaraf qoldi.
Qayd etilishicha, rezolyutsiyani qabul qilish uchun ovozlarning uchdan ikki qismi talab qilingan. Ushbu rezolyutsiya Falastinning BMT Bosh Assambleyasida huquqlari kengaytirilganidan keyin ovoz berishga taklif qilingan birinchi hujjat bo‘ldi.
Tegishli qaror loyihasi 18 banddan iborat bo‘lib, u Isroilning bosib olingan Falastin hududidagi barcha yerlarni zudlik bilan tark etishni talab qiladi. Shuningdek ushbu hujjat qabul qilinganidan keyin 12 oydan kechiktirmay amalga oshirilishi kerak bo‘ladi.
