Suriya Qurolli Kuchlari Rossiyaning og‘ir qurollangan avtokolonnasiga Tartus dengiz bazasiga kirishga ruxsat bermadi. Bu holat ikki davlat o‘rtasidagi munosabatlardagi sovuqlikni ko‘rsatmoqda. Ma’lumotlarga ko‘ra, 30 ta raketa bilan jihozlangan transport vositalaridan iborat kolonna Latakiya viloyatidagi Xmeymim aviabazasidan chiqib, Tartusga kirmoqchi bo‘lganida suriyalik harbiylar tomonidan nazorat-o‘tkazish punktida to‘xtatilgan. Sakkiz soatlik kutishdan so‘ng, kolonna mahalliy vaqt bilan soat 17:00 da Xmeymim avibazasiga qaytishga majbur bo‘lgan.
Bu voqea Rossiya qo‘shinlarining Suriyadan chiqib ketayotgani fonida sodir bo‘lmoqda. 2024 yil oxirida Hay’ati Tahrir ash-Shom (HTSH) guruhi tomonidan Bashar Asad rejimi ag‘darilganidan so‘ng, Rossiya o‘z qo‘shinlarini Tartusdan olib chiqishni boshladi. Sun’iy yo‘ldosh olgan suratlarda Tartus portidagi Rossiya texnikasi va materiallarining bosqichma-bosqich olib chiqilayotgani ko‘rinadi.
Suriyaning yangi hukumati mudofaa vaziri Murxaf Abu Qasraning so‘zlariga ko‘ra, Rossiya bazalarining saqlanishi ularning Suriya manfaatlarig qanchalik mos kelishiga bog‘liq. Agar bu Suriya uchun manfaatli bo‘lsa, Rossiya bazalari saqlanib qolishi mumkin.
Mazkur hodisa Rossiyaning Suriyadagi harbiy ishtiroki va ikki davlat o‘rtasidagi munosabatlar qanday rivojlanishini qayta ko‘rib chiqish zarurligini ko‘rsatmoqda.
Ta’kidlash kerak, avvalroq Suriya mudofaa vaziri Murhaf Abu Qasra mamlakatda Rossiya bazalari o‘z faoliyatini davom ettirishi uchun Rossiya Bashar Asadni topshirishi kerakligini aytgan edi. Shuningdek, boshqa talablarga ko‘ra, Rossiya Suriyani Asad rejimiga qo‘shilib vayron qilganini tan olishi va bir qancha milliard dollar tovon to‘lashi lozim.
Abdulloh Sayyid
