Сурия Қуролли Кучлари Россиянинг оғир қуролланган автоколоннасига Тартус денгиз базасига киришга рухсат бермади. Бу ҳолат икки давлат ўртасидаги муносабатлардаги совуқликни кўрсатмоқда. Маълумотларга кўра, 30 та ракета билан жиҳозланган транспорт воситаларидан иборат колонна Латакия вилоятидаги Хмеймим авиабазасидан чиқиб, Тартусга кирмоқчи бўлганида суриялик ҳарбийлар томонидан назорат-ўтказиш пунктида тўхтатилган. Саккиз соатлик кутишдан сўнг, колонна маҳаллий вақт билан соат 17:00 да Хмеймим авибазасига қайтишга мажбур бўлган.
Бу воқеа Россия қўшинларининг Суриядан чиқиб кетаётгани фонида содир бўлмоқда. 2024 йил охирида Ҳайъати Таҳрир аш-Шом (ҲТШ) гуруҳи томонидан Башар Асад режими ағдарилганидан сўнг, Россия ўз қўшинларини Тартусдан олиб чиқишни бошлади. Сунъий йўлдош олган суратларда Тартус портидаги Россия техникаси ва материалларининг босқичма-босқич олиб чиқилаётгани кўринади.
Суриянинг янги ҳукумати мудофаа вазири Мурхаф Абу Қасранинг сўзларига кўра, Россия базаларининг сақланиши уларнинг Сурия манфаатлариг қанчалик мос келишига боғлиқ. Агар бу Сурия учун манфаатли бўлса, Россия базалари сақланиб қолиши мумкин.
Мазкур ҳодиса Россиянинг Суриядаги ҳарбий иштироки ва икки давлат ўртасидаги муносабатлар қандай ривожланишини қайта кўриб чиқиш зарурлигини кўрсатмоқда.
Таъкидлаш керак, аввалроқ Сурия мудофаа вазири Мурҳаф Абу Қасра мамлакатда Россия базалари ўз фаолиятини давом эттириши учун Россия Башар Асадни топшириши кераклигини айтган эди. Шунингдек, бошқа талабларга кўра, Россия Сурияни Асад режимига қўшилиб вайрон қилганини тан олиши ва бир қанча миллиард доллар товон тўлаши лозим.
Абдуллоҳ Саййид
