Samarqand viloyatida 1 oylik kelinini o‘ldirgan qaynona 13 yilga qamaldi. Bu haqda Oliy sud matbuot kotibi Aziz Obidov xabar berdi.
Ma’lum qilinishicha, mudhish voqea 2024 yilning 3 oktyabr kuni Samarqand viloyati Narpay tumanida sodir bo‘lgan. Aslida sudlanuvchi ayol ko‘p yillar oldin onalik huquqidan mahrum qilingan hamda o‘g‘li va qizini bolalar uyiga topshirgan. Biroq u yillar o‘tib uylangan o‘g‘lining oldiga qaytib, boradigan joyi yo‘qligini aytgan. Shu tariqa ona o‘g‘li bilan yashay boshlagan.
Ammo ayol uyga kelishi bilanoq kelinini tinimsiz koyib, haqoratlab, kamsitgan. Kelin birinchi kuniyoq o‘z onasiga qo‘ng‘iroq qilib, qaynonasining xatti-harakatlari haqida gapirib bergan. 2024 yil oktyabr oyida ayol o‘g‘li uyda yo‘qligidan foydalanib, kelini bilan navbatdagi janjalni boshlagan. Mojaro jarayonida ayblanuvchi telefonning zaryadlash simini olib, qizni bo‘g‘a boshlagan, shundan so‘ng shisha idishni kelinining boshiga urib sindirgan. Shu bilan birga, qaynona qaychini olib, qizning bo‘yniga urgan, biroq bu bilan ham to‘xtamagan. Oshxonadan pichoqni olib, kelinning ko‘kragiga bir necha marotaba urgan. Kelin olgan tan jarohatlari oqibatida voqea joyida vafot etgan.
Sodir etilgan jinoyatdan so‘ng ayol qochishga uringan, biroq u qo‘lga olingan. Ayol Jinoyat kodeksining 97-moddasi (O‘ta shafqatsizlik bilan qasddan odam o‘ldirish, yengilroq jazo tayinlash) 2-qismi “j” bandi bilan aybli deb topilib, 13 yilga ozodlikdan mahrum etildi.
