Самарқанд вилоятида 1 ойлик келинини ўлдирган қайнона 13 йилга қамалди. Бу ҳақда Олий суд матбуот котиби Азиз Обидов хабар берди.
Маълум қилинишича, мудҳиш воқеа 2024 йилнинг 3 октябрь куни Самарқанд вилояти Нарпай туманида содир бўлган. Аслида судланувчи аёл кўп йиллар олдин оналик ҳуқуқидан маҳрум қилинган ҳамда ўғли ва қизини болалар уйига топширган. Бироқ у йиллар ўтиб уйланган ўғлининг олдига қайтиб, борадиган жойи йўқлигини айтган. Шу тариқа она ўғли билан яшай бошлаган.
Аммо аёл уйга келиши биланоқ келинини тинимсиз койиб, ҳақоратлаб, камситган. Келин биринчи куниёқ ўз онасига қўнғироқ қилиб, қайнонасининг хатти-ҳаракатлари ҳақида гапириб берган. 2024 йил октябрь ойида аёл ўғли уйда йўқлигидан фойдаланиб, келини билан навбатдаги жанжални бошлаган. Можаро жараёнида айбланувчи телефоннинг зарядлаш симини олиб, қизни бўға бошлаган, шундан сўнг шиша идишни келинининг бошига уриб синдирган. Шу билан бирга, қайнона қайчини олиб, қизнинг бўйнига урган, бироқ бу билан ҳам тўхтамаган. Ошхонадан пичоқни олиб, келиннинг кўкрагига бир неча маротаба урган. Келин олган тан жароҳатлари оқибатида воқеа жойида вафот этган.
Содир этилган жиноятдан сўнг аёл қочишга уринган, бироқ у қўлга олинган. Аёл Жиноят кодексининг 97-моддаси (Ўта шафқатсизлик билан қасддан одам ўлдириш, енгилроқ жазо тайинлаш) 2-қисми “ж” банди билан айбли деб топилиб, 13 йилга озодликдан маҳрум этилди.
