AsosiySalomatlik

O‘zbekistonda ilk bor onkogematologik kasallikka chalingan bemorlarda o‘zak hujayralar transplantatsiyasi o‘tkazildi

Dunyo miqyosida qon va qon yaratish tizimi kasalliklariga chalinish holatlari yildan-yilga ortib bormoqda.

'O‘zbekistonda ilk bor onkogematologik kasallikka chalingan bemorlarda o‘zak hujayralar transplantatsiyasi o‘tkazildi'ning rasmi

SSV Matbuot xizmatiga ko‘ra, O‘zbekiston aholisi orasida ham bu kabi xastaliklar tez-tez uchrayapti.

Ana shunday bemorlarga gematologik va transfuziologik yordam ko‘rsatish, xastaliklarni erta bosqichda aniqlash va samarali davolash borasida Respublika ixtisoslashtirilgan gematologiya ilmiy-amaliy tibbiyot markazi mamlakatimizdagi yetakchi tibbiyot muassasasi hisoblanadi.

Ushbu markaz direktori Miralisher Islamov bu yerda joriy yilning birinchi choragi davomida erishilgan eng muhim yutuqlar haqida ma’lumot berdi:

— Markazimizda o‘tgan yili birinchi marta allogen va gaploidentifik o‘zak hujayralar transplantatsiyasi yo‘lga qo‘yilgan edi. Umuman, bu yerda onkogematologik kasalliklarga chalingan 47 nafar bemorda o‘zak hujayralar transplantatsiyasi o‘tkazildi.

 Ma’lumot uchun aytish lozimki, bemorlarning aka-ukalari, qarindoshlari genotiplari to‘g‘ri kelmaganda, begona insonlarning suyak ko‘migi o‘zak hujayralari olinadi. Gaploidentifik o‘zak xujayralar transplantatsiyasi amaliyotining narxi chet el klinikalarida 100 ming — 250 ming AQSH dollarini tashkil etadi. 

 Yana bir muhim yangilik: joriy yilda gematologiya sohasida eng og‘ir xastalik bo‘lgan aplastik anemiya (ilik qurishi) kasalligiga chalingan 3 kishida eng noyob allogen suyak ko‘migi o‘zak hujayralar transplantatsiyasi O‘zbekistonda ilk bor o‘tkazildi. Hozirgi kunda bemorlar ambulator nazoratda, ahvoli yaxshi.

Bundan tashqari, markazda mikrobiologik laboratoriya tashkil etilib, yuqori texnologik avtomatlashtirilgan tahlillarni 72 soat ichida o‘tkazish usullari amaliyotga tatbiq etildi.

Shuningdek, 10 ta yuqori texnologik diagnostika va 8 ta yuqori texnologik davolash usuli joriy qilindi. Leykemiyani davolash bo‘yicha ishlanma uchun Yevroosiyo patenti olindi.

 Markazda 6 ta allogen va 3 ta auto o‘zak hujayralar transplantatsiyasi bajarildi. Shulardan eng noyobi — 3 ta allogen va gaploidentifik o‘zak hujayralar ko‘chirib o‘tkazish amaliyoti ilk bor aplastik anemiya bilan kasallangan bemorlarda o‘tkazildi.

 Hududiy filiallar va tuman tibbiyot birlashmalarida yangi diagnostika va davolash usullari joriy qilindi. Ular orasida umumiy qondagi hujayralarning morfologiyasi, shakli, hajmi, miqdorini o‘rganish, oqqon kasalliklarini tashxislashning sitokimyoviy usullari, tos suyagi treponobiopsiyasi bor. 

 Markazning 12 nafar mutaxassisi hududlarga safarbar qilinishi orqali Toshkent, Andijon, Namangan, Farg‘ona viloyatlarida va Toshkent shahar ko‘p tarmoqli tibbiyot markazi gematologiya filialida yangi davolash usullari tatbiq etildi. Shu viloyatlardagi surunkali miyeloleykoz bilan og‘riyotgan 211 nafar bemorda target davolash usullari va talassemiyaga chalingan 6 nafar bemorda Xelator terapiyasi amalga oshirilmoqda.

Albatta, ushbu yutuqlarga o‘z-o‘zidan erishilgani yo‘q. Buning zamirida mutaxassislarimizning tinimsiz izlanishlari yotibdi.

    Boshqa yangiliklar