ССВ Матбуот хизматига кўра, Ўзбекистон аҳолиси орасида ҳам бу каби хасталиклар тез-тез учраяпти.
Ана шундай беморларга гематологик ва трансфузиологик ёрдам кўрсатиш, хасталикларни эрта босқичда аниқлаш ва самарали даволаш борасида Республика ихтисослаштирилган гематология илмий-амалий тиббиёт маркази мамлакатимиздаги етакчи тиббиёт муассасаси ҳисобланади.
Ушбу марказ директори Миралишер Исламов бу ерда жорий йилнинг биринчи чораги давомида эришилган энг муҳим ютуқлар ҳақида маълумот берди:
— Марказимизда ўтган йили биринчи марта аллоген ва гаплоидентифик ўзак ҳужайралар трансплантацияси йўлга қўйилган эди. Умуман, бу ерда онкогематологик касалликларга чалинган 47 нафар беморда ўзак ҳужайралар трансплантацияси ўтказилди.
Маълумот учун айтиш лозимки, беморларнинг ака-укалари, қариндошлари генотиплари тўғри келмаганда, бегона инсонларнинг суяк кўмиги ўзак ҳужайралари олинади. Гаплоидентифик ўзак хужайралар трансплантацияси амалиётининг нархи чет эл клиникаларида 100 минг — 250 минг АҚШ долларини ташкил этади.
Яна бир муҳим янгилик: жорий йилда гематология соҳасида энг оғир хасталик бўлган апластик анемия (илик қуриши) касаллигига чалинган 3 кишида энг ноёб аллоген суяк кўмиги ўзак ҳужайралар трансплантацияси Ўзбекистонда илк бор ўтказилди. Ҳозирги кунда беморлар амбулатор назоратда, аҳволи яхши.
Бундан ташқари, марказда микробиологик лаборатория ташкил этилиб, юқори технологик автоматлаштирилган таҳлилларни 72 соат ичида ўтказиш усуллари амалиётга татбиқ этилди.
Шунингдек, 10 та юқори технологик диагностика ва 8 та юқори технологик даволаш усули жорий қилинди. Лейкемияни даволаш бўйича ишланма учун Евроосиё патенти олинди.
Марказда 6 та аллоген ва 3 та ауто ўзак ҳужайралар трансплантацияси бажарилди. Шулардан энг ноёби — 3 та аллоген ва гаплоидентифик ўзак ҳужайралар кўчириб ўтказиш амалиёти илк бор апластик анемия билан касалланган беморларда ўтказилди.
Ҳудудий филиаллар ва туман тиббиёт бирлашмаларида янги диагностика ва даволаш усуллари жорий қилинди. Улар орасида умумий қондаги ҳужайраларнинг морфологияси, шакли, ҳажми, миқдорини ўрганиш, оққон касалликларини ташхислашнинг цитокимёвий усуллари, тос суяги трепонобиопсияси бор.
Марказнинг 12 нафар мутахассиси ҳудудларга сафарбар қилиниши орқали Тошкент, Андижон, Наманган, Фарғона вилоятларида ва Тошкент шаҳар кўп тармоқли тиббиёт маркази гематология филиалида янги даволаш усуллари татбиқ этилди. Шу вилоятлардаги сурункали миелолейкоз билан оғриётган 211 нафар беморда таргет даволаш усуллари ва талассемияга чалинган 6 нафар беморда Хелатор терапияси амалга оширилмоқда.
Албатта, ушбу ютуқларга ўз-ўзидан эришилгани йўқ. Бунинг замирида мутахассисларимизнинг тинимсиз изланишлари ётибди.
