Lyuis Kas nomidagi tibbiyot maktabi olimlari yurak xurujidan keyin yurak toʻqimalarini qayta tiklashning yangi usulini topishdi. Bu haqda “Theranostics” jurnalida eʼlon qilingan.
Maʼlum qilinishicha, olimlar PSAT genini faollashtirish yurak toʻqimalarining regeneratsiyasini boshlashini aniqlagan. PSAT1 geni homiladorlik davrida hujayra oʻsishida faol ishtirok etadi, biroq kattalarda u deyarli ishlamaydi. Tadqiqotchilar ushbu genni oʻz ichiga olgan modifikatsiyalangan matritali RNK (modRNK) yaratib, uni infarktdan keyin darhol sichqonlarning yurak toʻqimalariga kiritgan.
Natijada, yurak mushak hujayralarining boʻlinishi faollashgan, chandiq toʻqimalar kamaygan va yangi qon tomirlari paydo boʻlgan. Bular hayvonlarda yurak faoliyatining sezilarli darajada yaxshilanishiga olib kelgan.
Maʼlumot uchun, Ushbu tadqiqotda qoʻllanilgan texnologiya – modRNK ilgari COVID-19 ga qarshi mRNK-vaktsinalarni ishlab chiqishda ham ishlatilgan. Tadqiqotchilarning fikricha, bu yondashuv yurak yetishmovchiligi terapiyasining yangi usullariga asos boʻlishi mumkin.
