Namangan viloyati Pop tumanida 36 yoshli erkakning noto‘g‘ri jarrohlik amaliyoti natijasida vafot etgani haqida ijtimoiy tarmoqlarda xabar tarqaldi. Xabar berilishicha, 27 mart kuni Pop tumanining "Chinor" mahallasida yashovchi Xojiakbar Kirgizovning tuman tibbiyot birlashmasida vafot etgani haqida xabar kelib tushgan.
Namangan viloyati prokuraturasi tomonidan berilgan ma’lumotga ko‘ra, Xojiakbar Kirgizov 13 mart kuni fermer xo‘jaligiga qarashli traktor tirkamasidan yiqilib, tan jarohati olgan. U o‘sha kuni darhol tuman tibbiyot birlashmasiga olib kelingan va jonlantirish bo‘limida jarrohlik amaliyoti o‘tkazilgan. Shuningdek, tibbiy muolajalar ham amalga oshirilgan. Biroq barcha tibbiy harakatlarga qaramay, Xojiakbar Kirgizov 27 mart kuni vafot etgan.
Mazkur holat yuzasidan tibbiy ekspertiza tayinlangan. Shuningdek, shifokorlarning xatti-harakatlari yuzasidan xizmat tekshiruvi ham o‘tkazilmoqda.
Namangan viloyati prokuraturasi holatni jiddiy nazoratga olib, Pop tumanidagi tergovga qadar tekshiruv harakatlari olib borilmoqda. Tergov natijalari bo‘yicha zarur choralar ko‘rilishi va aybdorlar javobgarlikka tortilishi mumkin.
