Toshkent shahar Sergeli tumanida joylashgan ko‘p qavatli binoda yong‘in sodir bo‘lgan uydan ikki yigit pichoqlangan holda topildi. Bu haqda “Millar” dasturida ma’lum qilindi.
Ma’lum bo‘lishicha, joriy yilning 7-aprel kuni soat 14:31 da Toshkent shahar Sergeli tumani, Quruvchilar dahasida joylashgan ko‘p qavatli uyda yong‘in sodir bo‘layotgani to‘g‘risida Toshkent shahar FVBga xabar kelib tushgan.
Boshqarma yong‘in oqibatida halok bo‘lgan va jabrlanganlar yo‘qligini bildirgan. Ammo xonadondan 2 nafar yigit pichoqlangan holatda topilgan.
Aniqlanishicha, gumonlanuvchi yigit Sergeli tumanidagi tanishining uyiga mehmonga kelgan. Kutilmaganda ular o‘rtasida kelishmovchilik sodir bo‘lgan. So‘ng yigit oshxonadagi pichoq bilan ikki nafar yigitga tan jarohati yetkazgan. Keyin yigitlar shifoxonaga yetkazilgan.
Shifokorlar bergan ma’lumotlarga ko‘ra, yigitlar jarrohlik amaliyotini boshdan o‘tkazgan va ularning hayoti saqlab qolingan. Ulardan biri besh marotaba, yana biri esa 7 marotaba pichoqlangani aytilgan.
Gumonlanuvchi voqea joyidan qochib ketgan. Uyni jinoyat sodir etgach yoqib yuborgani aytilmoqda. Bosh prokuratura holat yuzasidan jinoyat ishi qo‘zg‘atilganini, gumonlanuvchi esa qo‘lga olinganini ma’lum qildi.
