Rossiya fuqaroligini olish tartibiga yangi talab kiritildi. Bu haqda Zamon.uz ma'lum qildi.
Endilikda fuqarolik olish uchun ariza topshirayotgan xorijiy fuqarolar va fuqaroligi bo'lmagan shaxslar sudlanganlik holati mavjud emasligini tasdiqlovchi ma'lumotnoma taqdim etishi shart bo'ladi.
Tegishli farmon Rossiya prezidenti Vladimir Putin tomonidan imzolangan. Hujjatga ko'ra, ma'lumotnoma ariza beruvchining fuqaroligi mavjud bo'lgan davlatning vakolatli organi yoki fuqaroligi bo'lmagan shaxsga shaxsini tasdiqlovchi hujjat bergan davlat tomonidan rasmiylashtirilishi lozim.
Shuningdek, ushbu hujjat Rossiya fuqaroligiga ariza topshirish sanasidan ko'pi bilan uch oy oldin olingan bo'lishi kerak.
Farmonda ayrim toifalar uchun istisnolar ham nazarda tutilgan. Xususan, 2028 yil 1 yanvargacha Rossiya hududiga ko'chib o'tgan Ukraina fuqarolari hamda Ukrainada doimiy yashab kelgan fuqaroligi bo'lmagan shaxslar mazkur talabdan ozod etiladi.
Rossiya qonunchiligiga ko'ra, og'ir yoki bartaraf etilmagan sudlanganlik holati, shuningdek, jinoiy javobgarlikka tortilganlik fuqarolik olish to'g'risidagi arizani rad etish uchun asos bo'lishi mumkin.
Bundan tashqari, Rossiya hukumati fuqarolik olish uchun undiriladigan davlat bojini ham oshirishni rejalashtirmoqda. Taklif etilayotgan qonun loyihasiga ko'ra, boj miqdori amaldagi 4 200 rubldan 50 ming rublgacha oshirilishi mumkin.
