Kecha, 15-may kuni Toshkent shahar, Mirobod tumani, Turkiston ko‘chasida joylashgan vagon ta’mirlash deposida yong‘in yuz berdi. Bu haqda FVB axborot xizmati ma’lum qildi.
Qayd etilishicha, yong‘in soat 23:58 da boshlangan. Shunga ko‘ra, yong‘in-qutqaruv ekipajlari soat 00:03 da yong‘inga yetib borgan hamda vaziyat to‘liq nazoratga olingan.
Yong‘in soat 01:31 da qurshab olingan. Va soat 02:48 da bartaraf etilgan. Hodisa oqibatida tan jarohati olgan fuqarolar haqida xabar tushmagan.
Eslatib o‘tamiz, shu kunning o‘zida poytaxt Toshkentning Sergeli tumanida ham yong‘in sodir bo‘lgan. Unda do‘kon alanga ichida qolgan edi.
